തിരുവില്വാമല: സെൽഫിയുടെ ഇക്കാലത്ത് സ്ഥാനാർഥിയുടെ സെൽഫി ചുമരെഴുത്ത് കൗതുകമാകുന്നു. തിരുവില്വാമല പഞ്ചായത്തിലെ പട്ടിപ്പറന്പ് ഒൻപതാം വാർഡിലെ യുഡിഎഫ് സ്ഥാനാർഥിയാണ് തന്‍റെ തെരഞ്ഞെടുപ്പ് പ്രചരണത്തിന് സ്വന്തമായി ചുമരെഴുത്ത് നടത്തുന്നത്.
യുഡിഎഫ് സ്ഥാനാർത്ഥിയായ ടി.കെ.സുരേഷ് കോണ്ഗ്രസ് ബ്ലോക്ക് സെക്രട്ടറിയും ദളിത് കോണ്ഗ്രസ് ബ്ലോക്ക് പ്രസിഡൻറുമാണ്. കലാകാരനും ശിൽപിയുമായ സുരേഷ്ബാബു തന്‍റെ സ്വന്തം പ്രചരണത്തിന് ചുമരെഴുതാൻ സമയം കണ്ടെത്തുകയാണ്.
ചിഹ്നത്തോടൊപ്പം മതിലുകളിലും ഒഴിഞ്ഞ വീടുകളിലെ ചുമരുകളിലും ബഹുവർണങ്ങളിൽ ഉത്സവത്തിന്‍റെയും ആനപ്പൂരത്തിന്‍റെയും ചിത്രങ്ങൾ വരിച്ച് മനോഹരമാക്കിയ കാഴ്ച സോഷ്യൽ മീഡിയയിലും വൈറലായിരുന്നു.
ലോക്ഡൗണ്‍ കാലത്ത് വില്വമലയുടെ സാഹിത്യകാരൻ വി.കെ.എന്നിന്‍റെ ശിൽപം നിർമിച്ചതും ശ്രദ്ധേയമായിരുന്നു.തെരഞ്ഞെടുപ്പ് ഗോദയിൽ സംഘടനാരംഗത്ത് ഒന്നര പതിറ്റാണ്ടായി നിറസാന്നിധ്യമായ സിപിഎമ്മിലെ സി.ഗോപിദാസും ബിജെപി സ്ഥാനാർഥി ആർ. ഉണ്ണികൃഷ്ണനുമാണ് സുരേഷ്ബാബുവിന്‍റെ എതിരാളികൾ.
