കൊച്ചി: ലോക്‌സഭാ തിരഞ്ഞെടുപ്പിന്‍റെ മൂന്നാംഘട്ടം നടക്കുന്ന കേരളത്തിൽ വോട്ട് രേഖപ്പെടുത്തി സിനിമാതാരങ്ങളും. നടൻ മോഹൻലാൽ തിരുവനന്തപുരം മുടവൻമുകളിൽ വോട്ടവകാശം രേഖപ്പെടുത്തി. ആദ്യം വോട്ട് ചെയ്യാനായി നേരെ ബൂത്തിലേക്ക് കയറിയ ലാല്‍ വലിയ തിരക്കിനെ തുടര്‍ന്ന് ക്യൂവില്‍ നില്‍ക്കാന്‍ തീരുമാനിക്കുകയായിരുന്നു.
നടൻ മമ്മൂട്ടി തൃക്കാക്കര നിയോജകമണ്ഡലത്തിലെ 106-ാം നമ്പർ ബൂത്തിലാണ് വോട്ട് രേഖപ്പെടുത്തിയത്. ഭാര്യ സുൽഫത്തിനൊപ്പമാണ് താരം വോട്ട് ചെയ്യാനെത്തിയത്. വോട്ട് അധികാരവും, അവകാശവുമാണ്. അത് എല്ലാവരും വിനിയോഗിക്കണമെന്നും വോട്ട് ചെയ്ത ശേഷം മാധ്യമങ്ങളോട് മമ്മൂട്ടി പറഞ്ഞു.
ടൊവീനോ തോമസ് ഇരിങ്ങാലക്കുട ഗവൺമെന്‍റ് ഗേൾസ് സ്കൂളിൽ വോട്ടു ചെയ്തു. ആലപ്പുഴയിൽ നടൻ ഫഹദ് ഫാസിലും പിതാവും സംവിധായകനുമായ ഫാസിലും ഒരുമിച്ചെത്തിയാണ് വോട്ടു രേഖപ്പെടുത്തിയത്.
