എടപ്പാൾ: വയലിനു നടുവിലൂടെ കടന്നുപോകുന്ന വൈദ്യുതി ലൈൻ കമ്പി പൊട്ടിവീണു വയലിൽ തീറ്റയെടുത്തുകൊണ്ടിരുന്ന നാല് പോത്തുകൾ ഷോക്കേറ്റു ചത്തു. ഇന്നലെ ഉച്ചക്കുശേഷം മൂന്നരയോടെയായിരുന്നു അപകടം. കടകശേരി സി.പി അബ്ദുള്ളയുടെ പോത്തുകളാണ് ചത്തത്.
ഇരുപതോളം പോത്തുകളാണ് ഈ സമയം വയലിലുണ്ടായിരുന്നത്. വയൽ വരന്പിൽ സ്ഥാപിച്ചിരുന്ന വൈദ്യുതി ലൈനാണ് പൊട്ടി വീണത്. കാലപ്പഴക്കത്താലാണ് കന്പികൾ പൊട്ടിവീണതെന്നാണ് നാട്ടുകാർ പറയുന്നത്. വിവരമറിഞ്ഞു തവനൂർ വൈദ്യുതി സെക്ഷൻ ഓഫീസ് ഉദ്യോഗസ്ഥർ സ്ഥലത്തെത്തി അന്വേഷണം നടത്തി. തവനൂർ വെറ്ററിനറി സർജൻ സ്ഥലത്തെത്തി പോത്തുകളെ പോസ്റ്റുമോർട്ടം നടത്തി.
