സ്വന്തമായി സർവകലാശാല ആരംഭിക്കാൻ പദ്ധതിയുമായി ടെസ്ല സ്ഥാപകനും കോടീശ്വരനുമായ ഇലോൺ മസ്ക്. ടെക്സസിലെ ഓസ്റ്റിനിലാണ് സ്വന്തമായി സർവകലാശാല തുടങ്ങാൻ മസ്ക് പദ്ധതിയിടുന്നത്.
ശാസ്ത്രം എഞ്ചിനീയറിങ്, ടെക്‌നോളജി, കണക്ക് എന്നീ വിഷയങ്ങൾ കേന്ദ്രീകരിച്ചുള്ള നൂതന വിദ്യാഭ്യാസ പദ്ധതികൾ ലക്ഷ്യമിട്ടുകൊണ്ടാണ് സർവകലാശാല ആരംഭിക്കുക. അൻപത് വിദ്യാർത്ഥികൾക്കാണ് ആദ്യ ഘട്ടത്തിൽ പ്രവേശനം നേടാൻ സാധിക്കുന്നത്. വിദ്യാർത്ഥികൾക്ക് സ്കോളർഷിപ് അടക്കം നിരവധി ആനുകൂല്യങ്ങളും നൽകാനും പദ്ധതിയുണ്ട്.
2014 ൽ തന്‍റെ മക്കൾക്കും കമ്പനി ജീവനക്കാരുടെ മക്കൾക്കും പഠിക്കുന്നതിനായി ആഡ് ആസ്ട്ര എന്ന ചെറിയ സ്വകാര്യ സ്‌കൂളിന് മസ്ക് തുടക്കമിട്ടിരുന്നു.
ഇതിനു പിന്നാലെയാണ് സ്വന്തമായി സർവകലാശാല തുടങ്ങാനുള്ള പദ്ധതി ഇട്ടത്. യുഎസ് കോളജ് ബിരുദധാരികളുടെ കഴിവിൽ ഗണ്യമായ കുറവാണ് ഉള്ളതെന്ന് മസ്ക് വിമർശിച്ചു.
