എന്നാലും ശരത് എന്ന തന്‍റെ പുതിയ ചിത്രത്തിന്‍റെ ട്രെയിലർ കണ്ട് പ്രേക്ഷകർ നടുങ്ങരുതെന്ന് നടനും സംവിധായകനുമായ ബാലചന്ദ്രമേനോൻ. ബാലചന്ദ്രമേനോൻ തിരക്കഥയെഴുതി സംവിധാനം ചെയ്യുന്ന ചിത്രത്തിന്‍റെ ട്രെയിലർ പുറത്തിറങ്ങി.
തന്‍റെ ഫേസ് ബുക്ക് കുറിപ്പിലാണ് ട്രെയിലർ കണ്ട് ആരും നടുങ്ങരുതെന്ന് ബാലചന്ദ്രമേനോൻ പറയുന്നത്. കാന്പസ് പശ്ചാത്തലത്തിലുള്ള ചിത്രമാണ് എന്നാലും ശരത്.
ഫേസ്ബുക്ക് പോസ്റ്റ് ഇങ്ങനെ-
ഒരു അപേക്ഷ… “എന്നാലും ശരത്’ ട്രെയിലർ കണ്ടിട്ട് നടുങ്ങരുത്… സിനിമ കാലത്തിന് അനുസരിച്ചു മാറ്റങ്ങൾക്കു വിധയമാകേണ്ട മാധ്യമം ആണ്, ഒപ്പം നമ്മുടെ ശൈലിയും. സിനിമയെ സ്നേഹിച്ച് ആദ്യദിവസം തിയറ്ററിൽ എത്തുന്ന യുവത്വത്തെ കണക്കിലെടുത്തു ഞാൻ സംവിധാനം ചെയ്ത ചിത്രമാണ് ഇത്.
ഒപ്പം ഞാൻ പണ്ട് പറഞ്ഞ കാര്യങ്ങൾ കൂടി ഓർക്കുക, ജെയിംസ് ബോണ്ടിനെ വെച്ച് ഞാൻ ചിത്രം സംവിധാനം ചെയ്യാം, പക്ഷെ അയാളുടെ ഓരോ ഇടിയുടെയും പിന്നിൽ അവന്‍റെ കുടുംബത്തോടുള്ള സ്നേഹവും വിധയത്വവും ഉണ്ടാകും…നിങ്ങളുടെ അനുഗ്രഹങ്ങൾ പ്രതീക്ഷിച്ചു കൊണ്ട് , നിങ്ങളുടെ സ്വന്തം ബാലചന്ദ്രമേനോൻ.’
കൃഷ്ണ കാല സിനിമാസിന്‍റെ ബാനറിൽ ആർ. ഹരികുമാറാണ് ചിത്രം നിർമിക്കുന്നത്. ചാർലി ജോസ്, നിധി ആരുൺ, നിത്യ നരേഷ്, . മല്ലിക സുകുമാരൻ, സുരഭി ലക്ഷ്മി, മേജർ രവി, ലാൽ ജോസ്, ജൂഡ് ആന്‍റണി, സിദ്ധാർഥ് ശിവ എന്നിവർക്കൊപ്പം ബാലചന്ദ്രമേനോനും അഭിനയിക്കുന്നു.
