തങ്ങള്‍ക്കു ചുറ്റുമുള്ള ലോകത്ത് നേരിടുന്ന അവഗണനയ്‌ക്കെതിരേ പോരാടുന്ന ദളിതനായ ഒരു പിതാവിന്‍റെയും മകളുടെയും കഥ പറയുന്ന ഇരുനിറം എന്ന സിനിമയുടെ ഫസ്റ്റ് ലുക്ക് പോസ്റ്റര്‍ റിലീസായി.
ലിജോജോസ് പല്ലിശേരി, ഇന്ദ്രന്‍സ്, ലിയോ തദേവൂസ് തുടങ്ങിയവരുടെ ഫേസ്ബുക്ക് പേജിലൂടെയാണ് പോസ്റ്റര്‍ റിലീസ് ചെയ്തത്. കാടകലം എന്ന സിനിമയ്ക്ക് സംസ്ഥാന സര്‍ക്കാരിന്‍റെ മികച്ച കുട്ടികളുടെ സിനിമയ്ക്കുള്ള അവാര്‍ഡ് സ്വന്തമാക്കിയ തിരക്കഥാകൃത്ത് ജിന്‍റോ തോമസ് സംവിധാനം ചെയ്യുന്ന പുതിയ ചിത്രമാണിത്.
തിയറ്ററില്‍ വിജയകരമായി പ്രദര്‍ശനം തുടരുന്ന രജനീകാന്ത് അഭിനയിച്ച വേട്ടയാന്‍ എന്നചിത്രത്തില്‍ ശ്രദ്ധേയമായ വേഷം ചെയ്യുകയും സനല്‍കുമാര്‍ ശശിധരന്‍റെ വഴക്ക് എന്ന സിനിമയിലെ അഭിനയത്തിന് മികച്ച ബാലതാരമായി തെരഞ്ഞെടുക്കപ്പെടുകയും ചെയ്ത തന്മയ സോള്‍ ആണ് മുഖ്യ വേഷത്തില്‍ എത്തുന്നത്.
തന്മയയ്‌ക്കൊപ്പം ദീനീഷ് ആലപ്പി, ജിയോ ബേബി, നിഷ സാരംഗ്, കബനി, പ്രദീപ് ബാല, പോള്‍ ഡി, അജിത തുടങ്ങിയവരും അഭിനയിക്കുന്നു. അര്‍ജുന്‍ അബയ, ഷംസുദ്ദീന്‍ കുട്ടോത്ത് എന്നിവരുടെ വരികള്‍ക്ക് സാന്‍റി സംഗീതം ഒരുക്കുന്നു. കഥ-തിരക്കഥ വിഷ്ണു കെ. മോഹനന്‍, കാമറ റെജി ജോസഫ്, എഡിറ്റിംഗ് ആന്‍ഡ് ഡിഐ പ്രഹ്ലാദന്‍ പുത്തഞ്ചേരി, പ്രൊഡക്ഷന് ഡിസൈനര്‍ സിജോ മാളോല, ആര്‍ട്ട് ഡയറക്ടര്‍ ബിജു ജോസഫ്, മേക്കപ്പ് രാജേഷ് ജയന്‍, കോസ്റ്റ്യൂം പ്രീതി സിജോ, ചീഫ് അസോസിയേറ്റ് ഡയറക്ടര്‍ ലിജിന്‍ ഈപ്പന്‍, അസോസിയേറ്റ് ഡയറക്ടര്‍ സിറാജ് പേരാമ്പ്ര, പ്രൊഡക്ഷന് കണ്ട്രോളര് ചിക്കു ജിക്കു കട്ടപ്പന.
