തിരുവനന്തപുരം: പരീക്ഷാക്കാലം കഴിഞ്ഞതോടെ അധ്യയനവർഷത്തിന് സമാപനം കുറിച്ച് മധ്യവേനൽ അവധിയ്ക്കായി സംസ്ഥാനത്തെ പൊതുവിദ്യാലയങ്ങൾ നാളെ അടയ്ക്കും.
ജൂൺ ഒന്നിന് പുതിയ അധ്യയന വർഷത്തിന് തുടക്കം കുറിച്ച് വിദ്യാലയങ്ങൾ തുറക്കും. എസ്എസ്എൽസി പരീക്ഷ ഇന്നലെ പൂർത്തിയായി. 4.19 ലക്ഷം വിദ്യാർഥികളാണ് ഇക്കുറി പരീക്ഷ എഴുതിയത്.
കഴിഞ്ഞ ഒൻപതിനാണ് പത്താം ക്ലാസ് പരീക്ഷ ആരംഭിച്ചത്. ഒന്നു മുതൽ ഒൻപതു വരെ ക്ലാസുകളിലേയും പ്ലസ് വണ്‍ പ്ലസ് ടു ക്ലാസുകളിലേയും പരീക്ഷകൾ ഇന്ന് പൂർത്തിയാകും.
ഒന്നാം ക്ലാസ് പ്രവേശനത്തിനുള്ള നടപടികൾ ഏപ്രിൽ 17ന് ആരംഭിക്കും. ടിസി കൊടുത്തുള്ള പ്രവേശനം മേയ് 2നുശേഷം നടത്തും.
അടുത്ത അധ്യയന വർഷത്തേയ്ക്കായുള്ള സ്കൂൾ യൂണിഫോമും പുസ്തകങ്ങളും തയാറായതായി വിദ്യാഭ്യാസ വകുപ്പ് അറിയിച്ചു. ഏപ്രിൽ മൂന്നു മുതൽ എസ്എസ്എൽസി ഉത്തരക്കടലാസ് മൂല്യനിർണയും ആരംഭിക്കും.
70 മൂല്യനിർണയക്യാന്പുകളിലായി 18000 അധ്യാപകരാണ് മൂല്യനിർണയം നടത്തുന്നത്.മേയ് പകുതിയോടെ എസ്എസ്എൽസി ഫലപ്രഖ്യാപനം ഉണ്ടാവും.
4.42 ലക്ഷം വിദ്യാർഥികളാണ് രണ്ടാം വർഷ ഹയർസെക്കൻഡറി പരീക്ഷ എഴുതുന്നത്. 80 ക്യാന്പുകളിലായി ഏപ്രിൽ മൂന്നു മുതൽ ഹയർസെക്കൻഡറി മൂല്യനിർണയവും ആരംഭിക്കും. 25000 ത്തോളം അധ്യാപകർ മൂല്യനിർണയത്തിൽ പങ്കെടുക്കും.
