താനെ: മഹാരാഷ്ട്രയിലെ താനെയിൽ ജയ് ശ്രീ റാം എന്ന് വിളിക്കാൻ വിസമ്മതിച്ച മുസ്ലിം ടാക്സി ഡ്രൈവർക്ക് മർദനം. ഓണ്‍ലൈൻ ടാക്സി ഡ്രൈവറായ ഫൈസലിനാണ് മർദനം ഏറ്റത്. താനെയിൽനിന്നും ദിവയിലേക്ക് ഫൈസലിൻറെ ടാക്സിയിൽ യാത്ര ചെയ്തവരാണ് ആക്രമിച്ചത്.അക്രമി സംഘത്തിൽ അഞ്ച് പേരാണ് ഉണ്ടായിരുന്നത്. ദിവയിൽനിന്ന് മടങ്ങുംവഴിയായിരുന്നു സംഭവം.
മദ്യലഹരിയിലായിരുന്ന ഇവർ ഫൈസലിനോട് ജയ് ശ്രീ റാം എന്ന് വിളിക്കാൻ ആവശ്യപ്പെടുകയായിരുന്നു. എന്നാൽ ഇതിനു വിസമ്മതിച്ചതോടെ സംഘം ഫൈസലിനെ മർദിച്ചു. സംഭവുമായി ബന്ധപ്പെട്ട് മുംബൈ പോലീസ് മൂന്നു പേരെ അറസ്റ്റ് ചെയ്തിട്ടുണ്ട്. മറ്റുള്ളവർക്കായി പോലീസ് തെരച്ചിൽ ആരംഭിച്ചു.
