പാലാ: മകനെ ആസിഡ് ഒഴിച്ച് കൊലപ്പെടുത്തിയ കേസില്‍ പിതാവിനു ജീവപര്യന്തം തടവും പത്തു വര്‍ഷം കഠിന തടവും ശിക്ഷ വിധിച്ച് കോടതി. അന്തിനാട് മൂപ്പന്‍മല ഭാഗത്തുള്ള കാഞ്ഞിരത്തുംകുന്നേല്‍ ഗോപാല കൃഷ്ണന്‍ ചെട്ടിയാര്‍ക്കാണ് കഠിനതടവ് വിധിച്ച് പാലാ അഡീഷണല്‍ ഡിസ്ട്രിക്റ്റ് ആന്‍ഡ് സെഷന്‍സ് ജഡ്ജി കെ. അനില്‍കുമാര്‍ വിധി പ്രസ്താവിച്ചത്.
മകന്‍ ഷിനുവിനെ 2021 സെപ്റ്റംബർ 23 രാത്രിയിൽ ആസിഡ് ഒഴിച്ച് കൊലപ്പെടുത്തിയ കേസിലാണ് ശിക്ഷാവിധി. ഷിനുവിന്‍റെ രണ്ടാം മരണവാര്‍ഷികത്തിന്‍റെ തലേദിവസമാണ് വിധി പ്രസ്താവിച്ചിട്ടുള്ളത്.
പ്രതിയായ ടി. ഗോപാലകൃഷ്ണന്‍ ചെട്ടിയാര്‍ക്ക് ഇന്ത്യന്‍ ശിക്ഷാനിയമം 302-ാം വകുപ്പു പ്രകാരം ജീവപര്യന്തം തടവും ഒരുലക്ഷം രൂപ പിഴയും പിഴ ഒടുക്കിയില്ലെങ്കില്‍ രണ്ടുവര്‍ഷം കഠിനതടവും 326 എ വകുപ്പു പ്രകാരം പത്തു വര്‍ഷം കഠിനതടവും പതിനായിരം രൂപ പിഴയും പിഴ ഒടുക്കിയില്ലെങ്കില്‍ ഒരു വര്‍ഷം കഠിനതടവിനും വിധിച്ചു. ശിക്ഷ ഒരുമിച്ച് അനുഭവിച്ചാല്‍ മതി.
വീട്ടില്‍ ഉറങ്ങിക്കിടന്നിരുന്ന മകന്‍റെ ദേഹത്ത് പ്രതി മുന്‍വൈരാഗ്യത്തെത്തുടര്‍ന്ന് റബ്ബര്‍ഷീറ്റ് ഉറയ്ക്കുന്നതിനുള്ള ഫോര്‍മിക് ആസിഡ് ഒഴിക്കുകയായിരുന്നു. പൊള്ളലേറ്റ ഷിനുവിനെ പാലാ ജനറല്‍ ആശുപത്രിയില്‍ എത്തിക്കുകയും പിന്നീട് കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിക്കുകയും ചെയ്തു.
ഷിനുവിന്‍റെ ദേഹത്ത് 75 ശതമാനം പൊള്ളല്‍ ഏറ്റതിനാല്‍ പാലാ പോലീസിന്‍റെ അപേക്ഷപ്രകാരം ഏറ്റുമാനൂര്‍ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് ഷിനുവിന്‍റെ മരണമൊഴി രേഖപ്പെടുത്തുകയും ഇതനുസരിച്ച് പാലാ പോലീസ് സര്‍ക്കിള്‍ ഇന്‍സ്‌പെക്ടര്‍ കെ.പി. തോംസണ്‍ പ്രതി ഗോപാലകൃഷ്ണന്‍ ചെട്ടിയാര്‍ക്കെതിരേ കേസ് രജിസ്റ്റര്‍ ചെയ്യുകയും അന്വേഷണം നടത്തി കുറ്റപത്രം സമര്‍പ്പിക്കുകയും ചെയ്തു. പ്രോസിക്യൂഷനു വേണ്ടി അഡീഷണല്‍ പബ്ലിക് പ്രോസിക്യൂട്ടര് അഡ്വ. ജെയ്‌മോന്‍ ജോസ് പരിപ്പീറ്റത്തോട്ട് ഹാജരായി.
