കല്‍പ്പറ്റ: വടക്കേവയനാട്ടിലെ പുതുശേരി വെള്ളാരംകുന്നില്‍ കര്‍ഷകന്‍ പള്ളിപ്പുറം തോമസ്(സാലു-50) കടുവ ആക്രമണത്തെത്തുടര്‍ന്നു മരിച്ച പശ്ചാത്തലത്തില്‍ യുഡിഎഫും ബിജെപിയും മാനന്തവാടി താലൂക്കില്‍ ആഹ്വാനം ചെയ്ത ഹര്‍ത്താല്‍ പുരോഗമിക്കുന്നു.
തോമസിന്‍റെ കുടുംബത്തിനു 50 ലക്ഷം രൂപ നഷ്ടപരിഹാരം നല്‍കുക, ആശ്രിതരില്‍ ഒരാള്‍ക്കു ജോലി നല്‍കുക, കടുവയെ പിടികൂടുക, വന്യമൃഗശല്യത്തിനു പരിഹാരം കാണുക തുടങ്ങിയ ആവശ്യങ്ങള്‍ ഉന്നയിച്ചാണ് ഹര്‍ത്താല്‍.
ഇന്നലെ രാവിലെ എട്ടരയോടെ കൃഷിയിടത്തില്‍ കടുവ ആക്രമണത്തില്‍ വലതുകാലിനു ഗുരുതരമായി പരിക്കേറ്റ തോമസ് ഉച്ചകഴിഞ്ഞു കല്‍പ്പറ്റയിലെ സ്വകാര്യ ആശുപത്രിയിലാണ് മരിച്ചത്.
നാളെ ഉച്ചകഴിഞ്ഞു രണ്ടിനു പുതുശേരി സെന്‍റ് തോമസ് പള്ളിയിലാണ് സംസ്‌കാരം.നോര്‍ത്ത് വയനാട് വനം ഡിവിഷനിലെ മക്കിയാട് സ്റ്റേഷന്‍ പരിധിയിലാണ് പുതുശേരി വെള്ളാരംകുന്ന്.
ഇവിടെനിന്നു പോയ കടുവ ഒരു കിലോമീറ്റര്‍ അകലെ വാളാട് പൊള്ളല്‍ ഭാഗത്ത് ഉണ്ടെന്ന് നിഗമനത്തിലാണ് വനപാലകര്‍. കടുവയെ പിടികൂടുന്നതിനു വനസേന ശ്രമം തുടങ്ങി.
ഇതിന്‍റെ ഭാഗമായി വെള്ളാരംകുന്നിലും സമീപങ്ങളിലുമായി നിരീക്ഷണത്തിനു ഏഴ് കാമറകള്‍ സ്ഥാപിച്ചു. കടുവയെ കണ്ടെത്തുന്നതിനുള്ള തെരച്ചലിനു ഉപയോഗപ്പെടുത്തുന്നതിനു മുത്തങ്ങയില്‍നിന്നു കുംകിയാനകളെ എത്തിച്ചിട്ടുണ്ട്.
കടുവയെ കൂടുവച്ച് പിടിക്കാന്‍ ചീഫ് വൈല്‍ഡ് ലൈഫ് വാര്‍ഡന്‍ ഗംഗാസിംഗ് ഇന്നലെ ഉത്തരവായിരുന്നു. കൂടുവച്ച് പിടിക്കാനുള്ള ശ്രമം പരാജയപ്പെട്ടാല്‍ മയക്കുവെടി പ്രയോഗിക്കാമെന്നും ഉത്തരവിലുണ്ട്.
തൊണ്ടര്‍നാട്, തവിഞ്ഞാല്‍ പഞ്ചായത്തുകളിലെയും എടവക പഞ്ചായത്തിലെ ചില ഭാഗങ്ങളിലെയും വിദ്യാഭ്യാസ സ്ഥാപനങ്ങള്‍ക്കു ജില്ലാ കളക്ടര്‍ എ. ഗീത ഇന്നു അവധി പ്രഖ്യാപിച്ചിട്ടുണ്ട്.
