കോഴിക്കോട്: യാത്രക്കാരുടെ സുരക്ഷയ്ക്കായി ഒരുക്കിയ റോഡിലെ കാമറയുമായി ബന്ധപ്പെട്ട വിവാദം കത്തിനില്‍ക്കുന്നതിനിടെ ടാര്‍ജറ്റ് തികയ്ക്കാന്‍ മോട്ടോര്‍ വാഹനവകുപ്പ് നടത്തുന്ന പരിശോധനയിലും ‘പിഴ’ കൂടുന്നു.
സമീപകാലത്തായി തെറ്റായ രീതിയില്‍ യാത്രക്കാര്‍ക്ക് നോട്ടീസ് അയയ്ക്കുന്ന സംഭവങ്ങളാണു വര്‍ധിച്ചുവരുന്നത്.കഴിഞ്ഞ ദിവസം ആക്ടീവ സ്കൂട്ടർ യാത്രക്കാർ ഹെൽമറ്റ് ധരിക്കാതെ നിയമലംഘനം നടത്തിയെന്നു കാട്ടി സന്ദേശം ലഭിച്ചതാണ് ഇതില്‍ അവസാനത്തേത്.
ഒന്നുമറിയാത്ത ടിവിഎസ് സ്കൂട്ടർ യാത്രക്കാരനാണു പിഴ സന്ദേശം ലഭിച്ചത്.പെയിന്‍റിംഗ് തൊഴിലാളിയായ താമരശേരി കോരങ്ങാട് കരുവള്ളി മുഹമ്മദ് യാസീനാണ് പിഴ അടക്കാൻ ഫോണിൽ സന്ദേശമായി നോട്ടീസ് ലഭിച്ചത്.
മുഹമദ് യാസിന്‍റെ ഉടമസ്ഥതയിലുള്ള കെഎൽ 57 വൈ 4428 നമ്പർ ടിവിഎസ് എൻട്രോക്ക് സ്കൂട്ടറിൽ ഹെൽമറ്റില്ലാതെ രണ്ടു പേർ സഞ്ചരിച്ചെന്ന് കാണിച്ചാണു പിഴ അടയ്ക്കാൻ ചെലാൻ ലഭിച്ചത്.
മുഹമ്മദ് യാസീൻ ചെലാനിനൊപ്പമുള്ള ഫോട്ടോ പരിശോധിച്ചപ്പോഴാണ് ആക്റ്റീവ സ്കൂട്ടറിലാണ് രണ്ട് പേർ ഹെൽമറ്റ് ധരിക്കാതെ പോകുന്നതെന്നു ശ്രദ്ധയിൽപ്പെട്ടത്.
ആക്റ്റീവ സ്കൂട്ടറിന്‍റെ നമ്പർ കെഎൽ 57 വൈ 4424 ആയിരുന്നു. വാഹനത്തിന്‍റെ അവസാന നമ്പർ മാറിയാണു പിഴ ചെലാൻ മോട്ടോർ വാഹന വകുപ്പ് അയച്ചിരിക്കുന്നത്.
ആളുമാറി പിഴയടയ്ക്കാൻ ചെലാൻ നൽകുന്ന നിരവധി സംഭവങ്ങളാണ് അടുത്തിടെ റിപ്പോർട്ട് ചെയ്തത്.അതേസമയം, തിരുവനന്തപുരത്ത് ഹെൽമെറ്റ് ഇല്ലാതെ വണ്ടിയോടിച്ചെന്നു കാണിച്ച് പിക്കപ്പ് വാഹനത്തിനു പിഴ നോട്ടീസ് അയച്ച സംഭവത്തിൽ വിശദീകരണവുമായി മോട്ടോര്‍ വാഹന വകുപ്പ് എത്തിയിരുന്നു.
വണ്ടി നമ്പർ രേഖപ്പെടുത്തിയപ്പോൾ വന്ന പിഴവാണെന്നും നോട്ടീസ് പിൻവലിച്ചുവെന്നും എംവിഡി അറിയിച്ചു. ആറ്റിങ്ങൽ ആർടിഒയിലെ ഉദ്യോഗസ്ഥനാണ് പിഴവു സംഭവിച്ചത്.
