വാൻകൂവർ: പൂർണമായും വൈദ്യുതോർജത്തിൽ പ്രവർത്തിക്കുന്ന വാണിജ്യ യാത്രാവിമാനത്തിന്‍റെ ആദ്യ പരീക്ഷണം വിജയകരം. 750 കുതിരശക്തിയുടെ മോട്ടോർ ഘടിപ്പിച്ച സീപ്ലെയിൻ മൂന്നു മിനിട്ട് പറന്നു.
കാനഡയിലെ വാൻകൂവർ ആസ്ഥാനമാക്കി സീപ്ലെയിൻ സർവീസ് നടത്തുന്ന ഹാർബർ എയറും അമേരിക്കയിലെ പ്രൊപ്പൽഷൻ നിർമാണ കന്പനിയായ മാഗ്നിഎക്സും ചേർന്നാണു പരീക്ഷണം നടത്തിയത്. 63 വർഷം പഴക്കമുള്ള ഹവില്ലാൻഡ് ബീവർ സീപ്ലെയിനിൽ ഇലക്‌ട്രിക് മോട്ടോർ ഘടിപ്പിച്ച് ഉപയോഗിക്കുകയായിരുന്നു. ഹാർബർ എയറിന്‍റെ സ്ഥാപകനും സിഇഒയുമായ ഗ്രെഗ് മഗ്ഡഗൽ ആണ് പറത്തിയത്. വ്യോമയാന ചരിത്രത്തിൽ പുതുയുഗത്തിനു തുടക്കം കുറിച്ച സംഭവമാണിതെന്ന് മഗ്ഡഗൽ പറഞ്ഞു.
വൈദ്യുതി ചാർജ് ചെയ്യാൻ ലിഥിയം അയൺ ബാറ്ററിയാണ് ഉപയോഗിച്ചത്. 160 കിലോമീറ്റർ പറക്കാൻ വേണ്ട ഊർജമേ ഈ ബാറ്ററികൾക്കു നല്കാൻ കഴിയൂ എന്ന പോരായ്മയുണ്ട്. അതേസമയം ഹാർബർ എയറിന്‍റെ ഹ്രസ്വദൂര സർവീസുകൾക്ക് ഇതു ധാരാളമാണ്.
