കഞ്ചാവെന്നു പറഞ്ഞ് ഉണക്കപ്പുല്ല് നല്‍കി പറ്റിച്ച ആളെ പിന്തുടര്‍ന്ന് അയാള്‍ വന്ന ഓട്ടോ തട്ടിയെടുത്ത സംഭവത്തില്‍ അഞ്ചു പേര്‍ അറസ്റ്റില്‍.
എആര്‍ നഗര്‍ സ്വദേശികളായ നെടുങ്ങാട്ട് എന്‍ വിനോദ് കുമാര്‍(38), വാല്‍പ്പറമ്പില്‍ സന്തോഷ് (42), മണ്ണില്‍തൊടി ഗോപിനാഥന്‍ (38), കൊളത്തറയിലെ വരിക്കോളി മജീദ് (50), കുതിരവട്ടം സ്വദേശി പറമ്പത്തൊടി ദിനേശന്‍ (47) എന്നിവരാണ് അറസ്റ്റിലായത്.
പരപ്പനങ്ങാടിയില്‍ ഖാലിദ് എന്നയാളുടെ ഓട്ടോറിക്ഷയാണ് സംഘം തട്ടിയെടുത്തത്. ചിറമംഗലം ജംഗ്ഷനില്‍നിന്ന് റഷീദ് എന്നയാള്‍ ഖാലിദിന്റെ ഓട്ടോ വിളിച്ച് തലപ്പാറയിലേക്കു പോവുകയായിരുന്നു.
അവിടെവച്ച് പ്രതികള്‍ക്ക് കഞ്ചാവെന്നു പറഞ്ഞ് ഉണക്കപ്പുല്ല് നല്‍കി 20,000 രൂപ കൈപ്പറ്റിയതായി പോലീസ് പറഞ്ഞു.
എന്നാല്‍ ഇയാള്‍ പോയ ശേഷം പറ്റിക്കപ്പെട്ടെന്നു മനസ്സിലായ സംഘം ഇയാള്‍ വന്ന ഓട്ടോറിക്ഷയെ പിന്തുടര്‍ന്നെത്തിയെങ്കിലും റഷീദ് അതിനോടകം സ്ഥലം കാലിയാക്കിയിരുന്നു.
റഷീദിനെ കിട്ടാത്തതിനാല്‍ ഡ്രൈവറെ ഭീഷണിപ്പെടുത്തി പ്രതികള്‍ ഓട്ടോ തട്ടിയെടുക്കുകയായിരുന്നു. ഓട്ടോ ഡ്രൈവറുടെ പരാതിയില്‍ കേസെടുത്ത് നടത്തിയ അന്വേഷണത്തിലാണ് പ്രതികളെ പിടികൂടിയത്.
