അടുത്ത സീസണിൽ വെയ്ൽസ് താരം ഗാരെത് ബെയ്ൽ സ്പാനിഷ് ലാ ലിഗ ഫുട്ബോൾ ക്ലബ്ബായ റയൽ മാഡ്രിഡിൽ ഉണ്ടാകില്ലെന്ന് സൂചന. ബെയ്‌ലിന് ഏതു ക്ലബ്ബിലേക്ക് വേണമെങ്കിലും ചേക്കേറാമെന്നും അതിനുള്ള സ്വാതന്ത്ര്യം റയൽ അനുവദിച്ചെന്നും സ്പാനിഷ് മാധ്യമങ്ങൾ റിപ്പോർട്ട് ചെയ്തു.
അടുത്ത ട്രാൻസ്ഫർ വിൻഡോയിലൂടെ 3887 കോടി രൂപയുടെ ട്രാൻസ്ഫറുകളാണ് റയൽ മാഡ്രിഡ് പരിശീലകനായി രണ്ടാം വരവ് നടത്തിയ സിനദിൻ സിദാൻ ലക്ഷ്യംവയ്ക്കുന്നത്. ഇതിന്‍റെ ഭാഗമായാണ് ബെയ്‌ലിനെ ക്ലബ് ഒഴിവാക്കുന്നത്. സിദാന്‍റെ മടങ്ങി വരവോടെ ബെയ്‌ലിനു പുറത്ത് പോകേണ്ടിവരുമെന്ന് നേരത്തേ റിപ്പോർട്ടുണ്ടായിരുന്നു.
റയൽ ഡയറക്ടർ ഹൊസെ എയ്ഞ്ചൽ സാഞ്ചസ് ബെയ്‌ലിന്‍റെ ഏജന്‍റുമാരായ ജോനാഥൻ ബർനെറ്റ്, ലൂയിസ് അലോണ്സോ എന്നിവരുമായി ട്രാൻസ്ഫർ കാര്യം ചർച്ച ചെയ്തെന്നാണ് സൂചന.
