ന്യൂഡല്‍ഹി: തിരക്കേറിയ മാര്‍ക്കറ്റില്‍ തന്റെ പിറകേ നടന്ന് അശ്ലീലം പറഞ്ഞ യുവാവിനെ യുവതി പിടികൂടി പഞ്ഞിക്കിട്ടു. പശ്ചിമ ഡല്‍ഹിയിലെ കാേള്‍ ബാഗിലുള്ള ഗാഫര്‍ മാര്‍ക്കറ്റിലാണ് സംഭവം.
ഇക്കഴിഞ്ഞ 25ന് സുഹൃത്തിനൊപ്പം നടന്നുപോകുന്നതിനിടെയാണ് നാലഞ്ചു പേര്‍ വരുന്ന യുവാക്കളുടെ സംഘം യുവതിയെ പിന്തുടര്‍ന്ന് ‘കമന്റടിച്ചത്’. ഭയന്നു ഓടാനോ മറ്റാരോടും പരാതിപ്പെടാനോ യുവതി തയ്യാറായില്ല. പകരം സംഘത്തിലൊരാളുടെ കോളറിന് പിടിച്ച് കരണത്ത് ഒന്ന് പൊട്ടിച്ചു, പിന്നെ അവനെ വലിച്ചിഴച്ച് പോലീസ് സ്റ്റേഷനില്‍ എത്തിക്കുകയും ചെയ്തു.
യുവാക്കള്‍ കമന്റടിച്ച് അപമാനിക്കാന്‍ തുടങ്ങിയതോടെയാണ് യുവതിയും സുഹൃത്തും ഒരു സൈക്കിള്‍ റിക്ഷയില്‍ കയറി യാത്ര തുടരാന്‍ തീരുമാനിച്ചത്. എന്നാല്‍ യുവാക്കള്‍ക്ക് വിടാന്‍ ഭാവമില്ലായിരുന്നു. സൈക്കിള്‍ റിക്ഷയെ പിന്തുടര്‍ന്ന അവര്‍ കമന്റടി തുടരുകയും ചെയ്തു.
ഇതോടെ രോഷാകുലയായ യുവതി റിക്ഷയില്‍ നിന്നിറങ്ങി സംഘത്തിലൊരാളെ പിടിച്ച് അടിക്കുകയായിരുന്നു. ഇതോടെ ആളുകള്‍ കൂടി. ഈ സമയം അവനെ വലിച്ചിഴച്ച് അവള്‍ സമീപത്തുള്ള പോലീസ് സ്റ്റേഷനില്‍ എത്തിച്ചു. പരാതിയും നല്‍കി.
പരാതിയില്‍ പോലീസ് രണ്ടു പേരെ കൂടി അറസ്റ്റു ചെയ്തു. മനീഷ് അഭിഷേക് എന്നിവരെ ഹരിയാനയിലെ ചര്‍കി ദാദ്രിയില്‍ നിന്നാണ് പിടികൂടിയത്. കഴിഞ്ഞ മാസം ഐടിഒ മെട്രോ സ്റ്റേഷനില്‍ ഒരു മാധ്യമപ്രവര്‍ത്തക അടക്കം രണ്ടു പേരെ ഒരു മദ്യപാനി അപമാനിക്കാന്‍ ശ്രമിച്ചിരുന്നു. 2017ലെ പോലീസ് റെക്കോര്‍ഡ് പ്രകാരം ഡല്‍ഹിയില്‍ ഒരു ദിവസം ശരാശരി അഞ്ച് മാനഭംഗക്കേസുകളാണ് രജിസ്്റ്റര്‍ ചെയ്യുന്നത്.
2016ല്‍ 2,064 കേസുകള്‍ റിപ്പോര്‍ട്ട് ചെയ്തിരുന്നു. 2017ല്‍ ഇത് 2,049 എണ്ണമായിരുന്നു. സ്ത്രീകളെ അപമാനിക്കാന്‍ ശ്രമിച്ചതിന് കഴിഞ്ഞ വര്‍ഷം 3,273 കേസുകളാണ് രജിസ്റ്റര്‍ ചെയ്തത്. എന്തായാലും യുവതിക്കിപ്പോള്‍ അഭിനന്ദനപ്രവാഹമാണ്.
