നെടുമ്പാശേരി: നെടുന്പാശേരി അന്താരാഷ്ട്ര വിമാനത്താവളത്തിൽ വിദേശത്തുനിന്നും രണ്ട് വിമാനങ്ങളിൽ എത്തിയ രണ്ട് യാത്രക്കാരിൽ നിന്നായി 47 ലക്ഷം രൂപ വിലവരുന്ന 907. 19 ഗ്രാം സ്വർണം പിടികൂടി.
ഇന്ന് പുലർച്ചെ ക്വലാലംപൂരിൽനിന്നും കൊച്ചി അന്താരാഷ്ട്ര വിമാനത്തിൽ വന്ന മലേഷ്യൻ സ്വദേശിയായ തനി സ്വരൻ കുപ്പുസ്വാമിയിൽനിന്നും 37 ലക്ഷം രൂപ വിലവരുന്ന 710 . 39 ഗ്രാം സ്വർണമാണ് പിടികൂടിയത്.
മൂന്ന് സ്വർണ്ണ മാലയും മൂന്ന് സ്വർണ്ണ വളയും ഇയാൾ വസ്ത്രത്തിനുള്ളിൽ ഒളിപ്പിച്ചാണ് അനധികൃതമായി കടത്തുവാൻ ശ്രമിച്ചത് .ഇന്ന് പുലർച്ചെ ഷാർജയിൽ നിന്നും കൊച്ചി അന്താരാഷ്ട്ര വിമാനത്താവളത്തിൽ എത്തിയ എയർ ഇന്ത്യ എക്സ്പ്രസ് വിമാനത്തിൽ വന്ന യാത്രകാരനായ പാലക്കാട് സ്വദേശി മുഹമ്മദ് റാഷിദിൽ നിന്നാണ് അനധികൃതമായി കടത്തുവാൻ ശ്രമിച്ച 196 . 8 ഗ്രാം സ്വർണ്ണം പിടിച്ചത്.
ഇതിന് പത്ത് ലക്ഷം രൂപ വില വരും. കുറച്ച് സ്വർണ്ണം മിശ്രിതമാക്കി കാലിനടിയിൽ ഒട്ടിച്ചാണ് അനധികൃതമായി കടത്തുവാൻ ശ്രമിച്ചത്. രണ്ട് സ്വർണമാലയും ഇയാളിൽ നിന്നും പിടികൂടിട്ടുണ്ട്. സ്വർണം അനധികൃതമായി കടത്തുവാൻ ശ്രമിച്ച രണ്ട് യാത്രക്കാരെയും എയർ കസ്റ്റംസ് ഇന്‍റലിജൻസ് വിഭാഗം കസ്റ്റഡിലെടുത്ത് ചോദ്യം ചെയ്തു വരികയാണ്.
