കുണ്ടറ: കഴുത്തിൽ കയർ കുരുക്കി കിണറ്റിൽ ചാടി ആത്മഹത്യക്ക് ശ്രമിച്ച വയോധികനെ അഗ്നിശമനസേന രക്ഷപെടുത്തി. കരിക്കോട് ചാത്തിനാങ്കുളത്തിന് സമീപം കളീലിൽ പടിഞ്ഞാറ്റത്തിൽ വീട്ടിൽ ഗോപാലൻ നായർ (80) ആണ് കഴുത്തിൽ കയർ കുരുക്കി കിണറ്റിൻ ചാടിയത്.
ഇന്നലെ പുലർച്ചെ അഞ്ചോടെ ആയിരുന്നു സംഭവം. കുണ്ടറ അഗ്നിരക്ഷാ നിലയത്തിൽ ലഭിച്ച സന്ദേശത്തെ തുടർന്ന് സീനിയർ ഫയർ ആൻഡ് റെസ്ക്യൂ ഓഫീസർ റഹിം കുട്ടിയുടെ നേതൃത്വത്തിൽ സംഭവസ്ഥലത്ത് എത്തുമ്പോൾ ആൾ ഏകദേശം 40 അടിയോളം ആഴമുള്ള കിണറ്റിൽ കയറിൽ കുരുങ്ങിയ നിലയിൽ നിൽക്കുകയായിരുന്നു.
ഉടൻതന്നെ ഫയർ ആൻഡ് റെസ്ക്യൂ ഓഫീസർ പി എസ് ബിനു കിണറ്റിൻ ഇറങ്ങി കയർമുറിച്ച് മാറ്റി. നെറ്റ് , റോപ്പ്‌ ഇവ ഉപയോഗിച്ച് ഇയാളെ സുരക്ഷിതമായി കരയ്ക്കുകയറ്റി.
ഫയർ ആൻഡ് റെസ്ക്യൂ ഓഫീസർ മാരായ അനി, സഞ്ജയൻ.വി, വിനോദ് ടൈറ്റസ്, ശിവലാൽ ഹരിചന്ദ് എന്നിവർ രക്ഷാപ്രവർത്തനത്തിൽ പങ്കെടുത്തു.
