കൊല്ലം: വിദ്യാർഥിനി ജീവനൊടുക്കിയതിന് തുടർന്ന് അടഞ്ഞുകിടക്കുന്ന കൊല്ലം ട്രിനിറ്റി ലൈസിയം സ്കൂൾ തുറക്കുന്നതിനായി ജില്ലാ ഭരണകൂടം വിളിച്ചുച്ചേർത്ത പിടിഎ യോഗത്തിൽ ബഹളം. രക്ഷിതാക്കൾ ചേരിതിരിഞ്ഞ് ഏറ്റുമുട്ടി. സ്കൂൾ തുറക്കാൻ അനുവദിച്ചില്ലെങ്കിൽ ഹൈക്കോടതിയെ സമീപിക്കണമെന്ന് ഒരു വിഭാഗം രക്ഷിതാക്കൾ ആവശ്യപ്പെട്ടു.
കുറ്റക്കാരായ അധ്യാപകർക്കെതിരെ നടപടി എടുത്തശേഷം സ്കൂൾ തുറന്നുപ്രവർത്തിച്ചാൽ മതിയെന്ന ആവശ്യവുമായി ചില മാതാപിതാക്കളും രംഗത്തെത്തി. ഇരുവിഭാഗങ്ങൾ തമ്മിലുള്ള തർക്കം രൂക്ഷമായതോടെ പോലീസ് ഇടപെട്ട് രംഗം ശാന്തമാക്കി. മാധ്യമപ്രവർത്തകർക്ക് നേരെയും കയ്യേറ്റമുണ്ടായി.
രണ്ടാഴ്ച മുന്പാണ് പത്താം ക്ലാസ് വിദ്യാർഥിനി ഗൗരി നേഹ സ്കൂളിലെ മൂന്നാം നിലയിൽനിന്ന് ചാടി മരിച്ചത്. സ്കൂളിലെ രണ്ട് അധ്യാപികമാർക്കെതിരേ ആത്മഹത്യാപ്രേരണ കുറ്റത്തിന് പോലീസ് കേസെടുത്തിരുന്നു. ഇന്ന് കേസ് ഡയറി ഹൈക്കോടതിയിൽ നൽകും.
