കോട്ടയം: മൂലേടത്ത് കുരിശിൻതൊട്ടി എറിഞ്ഞു തകർത്തു. മൂലേടം സെന്‍റ് മേരീസ് ഓർത്തഡോക്സ് പള്ളിയുടെ ദിവാൻകവലയ്ക്കു സമീപമുള്ള കുരിശടിയാണ് ആരോ ഇന്നലെ രാത്രിയിൽ എറിഞ്ഞു തകർത്തത്. കുരിശടിയുടെ ഗ്ലാസും മാതാവിന്‍റെ ചിത്രവും തകർന്നു. ഇന്നു രാവിലെയാണ് സംഭവം നാട്ടുകാർ അറിഞ്ഞത്. പള്ളി ഭാരവാഹികൾ അറിയിച്ചതനുസരിച്ച് ഈസ്റ്റ് പോലീസ് സ്ഥലത്തെത്തി അന്വേഷണം ആരംഭിച്ചു.
കല്ലിന് എറിഞ്ഞതാണോ അതോ വടികൊണ്ട് അടിച്ചതാണോ എന്നു വ്യക്തമല്ല. അർധ രാത്രിക്ക് ശേഷമാണ് സംഭവമെന്ന് സമീപവാസികൾ പറയുന്നു. ഒരു മാനസിക രോഗി ഇതുവഴി കറങ്ങുന്നുണ്ടായിരുന്നതായി നാട്ടുകാർ പറയുന്നു. ഇയാളെ പോലീസും സംശയിക്കുന്നുണ്ട്. അതല്ലാതെ മറ്റു അക്രമ സംഭവങ്ങൾ ഒന്നും ഉണ്ടാകാനിടയില്ലെന്ന് പോലീസ് പറയുന്നു.
