വിയ്യൂർ: സിനിമ കാണാനെത്തിയവരെ തോക്കു ചൂണ്ടി വിറപ്പിച്ച യുവാവിനെ പോലീസ് പിടികൂടി ജാമ്യത്തിൽ വിട്ടു. വടക്കാഞ്ചേരി ഓട്ടുപാറ സ്വദേശി സുഭാഷിനെ(23)യാണ് സെക്യൂരിറ്റി ജീവനക്കാർ കീഴടക്കി പോലീസിലേൽപ്പിച്ചത്.
ഇന്നലെ വൈകീട്ട് നഗരത്തിനടുത്തുള്ള മാളിലെ തീയേറ്ററിലാണ് സംഭവം.
കൂട്ടുകാരോടൊത്താണ് ഇയാൾ സിനിമ കാണാനെത്തിയത്. ഒളിപ്പിച്ചുവച്ചിരുന്ന തോക്കെടുത്ത് ആളുകൾക്കു നേരെ ചൂണ്ടുകയായിരുന്നു. ഇതു കണ്ട് ആളുകൾ ഭയന്നോടി. ഉടൻ അവിടെയെത്തിയ സെക്യൂരിറ്റി ജീവനക്കാർ യുവാവിനെ കീഴ്പ്പെടുത്തി വിയ്യൂർ പോലീസിന് കൈമാറി.
സ്റ്റേഷനിലെത്തി പരിശോധിച്ചപ്പോഴാണ് കളിത്തോക്കായിരുന്നുവെന്ന് മനസിലായത്. വിദ്യാർഥിയാണെന്നും പ്രണയമുണ്ടെന്നുമൊക്കെയാണ് ആദ്യം പോലീസിനോട് പറഞ്ഞത്. എസ്ഐയുടെ നേതൃത്വത്തിലുള്ള സംഘം യുവാവിനെ ചോദ്യം ചെയ്ത് ജാമ്യത്തിൽ വിട്ടയച്ചു.
