ബലാത്സംഗകേസില്‍ 20 വര്‍ഷത്തെ തടവുശിക്ഷ അനുഭവിക്കുന്ന വിവാദ ആള്‍ദൈവം ഗുര്‍മീത് സിങ്ങും ഇന്ത്യന്‍ ക്രിക്കറ്റ് ടീം നായകന്‍ കോഹ്‌ലിയുമായുള്ള കുടിക്കാഴ്ച ഏറെ കോലാഹലങ്ങള്‍ ഉണ്ടാക്കിയിരുന്നു. ഇന്ത്യന്‍ ക്രിക്കറ്റ് ടീമിലെ രണ്ടു പേര്‍ ഉള്‍പ്പെടെയാണ് കോഹ്‌ലി ഗുര്‍മീതിനെ സന്ദര്‍ശിക്കാന്‍ ആശ്രമത്തില്‍ പോയത്. സന്ദര്‍ശനത്തിന്റെ വീഡിയോ ഉള്‍പ്പെടെ പുറത്തെത്തിയതോടെ വിവാദവും കനത്തു.
ആള്‍ദൈവം ജയിലിലായതിനു പിന്നാലെ ഇതാദ്യമായി കോഹ്‌ലി ആ സന്ദര്‍ശനത്തെക്കുറിച്ച് വെളിപ്പെടുത്തി. കോഹ്‌ലിയും ആമിര്‍ഖാനും തമ്മിലുള്ള ചാറ്റ് ഷോയിലാണ് കോഹ്‌ലി ആദ്യമായി ആ സന്ദര്‍ശനത്തെക്കുറിച്ച്് മനസു തുറന്നത്. ഗുര്‍മീത് റാം റഹിം സിംഗിനെ നേരില്‍ കണ്ടപ്പോഴുള്ള അനുഭവം രസകരമായിരുന്നുവെന്നാണ് കോഹ്‌ലി ആദ്യം പറഞ്ഞത്. തനിക്കൊപ്പം ഉണ്ടായിരുന്ന ആശിഷ് നെഹ്‌റയുടേയും, യൂസഫ് പത്താന്റെയും പേരുകള്‍ തെറ്റിച്ച് പറഞ്ഞ സംഭവവും കോഹ്‌ലി ഓര്‍മ്മിക്കുന്നു. ആശിഷ് നെഹ്‌റയെ ജഗദീഷ് നെഹ്‌റയെന്നും, പത്താനെ ജോസഫ് പത്താന്‍ എന്നുമാണ് ഗുര്‍മീത് വിളിച്ചത്. ഗുര്‍മീതിന്റെ അബദ്ധം എല്ലാവരിലും ചിരി പടര്‍ത്തിയെന്നും കോഹ്‌ലി പറഞ്ഞു.
