ജിമ്മില്‍ വ്യായാമത്തിനെത്തിയ യുവതിയെ ലൈംഗികമായി പീഡിപ്പിക്കാന്‍ ശ്രമിച്ച ട്രെയിനര്‍ അറസ്റ്റില്‍. പാലക്കല്‍ സ്വദേശിയായ അജ്മലിനെയാണ് നെടുപുഴ പോലീസ് അറസ്റ്റ് ചെയ്തത്.
യുവതി നല്‍കിയ പരാതിയുടെ അടിസ്ഥാനത്തില്‍ കേസെടുത്ത് അന്വേഷണം ആരംഭിച്ച പോലീസ് കഴിഞ്ഞ ദിവസം പ്രതിയെ പിടികൂടുകയായിരുന്നു.
ഇയാളുടെ ഉടമസ്ഥതയിലുള്ള വടൂക്കര ഫോര്‍മല്‍ ഫിറ്റ്‌നസ് സെന്ററില്‍ കഴിഞ്ഞ മാസം 22നാണ് യുവതിയെ ലൈംഗികമായി ഉപദ്രവിക്കാന്‍ ശ്രമം ഉണ്ടായത്.
ജിമ്മില്‍ വ്യായാമം കഴിഞ്ഞ് സ്റ്റീം ബാത്ത് ചെയ്യുന്നതിനിടയിലാണ് പ്രതി യുവതിയെ ലൈംഗികമായി പീഡിപ്പിക്കാന്‍ ശ്രമിച്ചത്.
യുവതി ബഹളം വെച്ച് പ്രതിരോധിച്ചതോടെ അജ്മല്‍ പിന്മാറി. ഇതിന് പിന്നാലെ യുവതി പോലീസ് സ്റ്റേഷനിലെത്തി അജ്മലിനെതിരേ പരാതി നല്‍കുകയായിരുന്നു.
പോലീസ് കേസെടുത്ത് അന്വേഷണം ആരംഭിച്ചെങ്കിലും പ്രതി ഒളിവില്‍ പോകുകയായിരുന്നു. അന്വേഷണം നടന്നുവരുതന്നതിനിടെയാണ് കഴിഞ്ഞ ദിവസം അജ്മല്‍ പിടിയിലായത്.
എസ്‌ഐ അനുദാസ്, സിപിഒമാരായ പ്രിയന്‍, ശ്രീജിത്ത്, ജോവിന്‍സ് എന്നിവര്‍ ഉള്‍പ്പെട്ട പൊലീസ് സംഘമാണ് ഇയാളെ പിടികൂടിയത്.
കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് ജുഡീഷ്യല്‍ കസ്റ്റഡിയില്‍ വിട്ടു. പ്രതിക്കെതിരെ ചേര്‍പ്പ് പോലീസ് സ്റ്റേഷന്‍ പരിധിയില്‍ മറ്റൊരു ബലാത്സംഗക്കേസ് കൂടിയുണ്ടെന്ന് പൊലീസ് പറഞ്ഞു.
