തീവണ്ടിയില്‍ വിദ്യാര്‍ഥിനികള്‍ക്കു മുമ്പാകെ ലൈംഗികചേഷ്ടകള്‍ കാട്ടിയ പ്രതിയെ തിരഞ്ഞ് പോലീസ്.
കഴിഞ്ഞദിവസം നാഗര്‍കോവില്‍-കോട്ടയം എക്സ്പ്രസില്‍ തിരുവനന്തപുരത്തുനിന്ന് കൊല്ലത്തേക്ക് യാത്രചെയ്ത സഹോദരിമാര്‍ക്കാണ് ദുരനുഭവമുണ്ടായത്.
തിരുവനന്തപുരം സെന്‍ട്രല്‍ സ്റ്റേഷനില്‍നിന്ന് തീവണ്ടിയില്‍ കയറിയ ഭിന്നശേഷിക്കാരനാണ് പെണ്‍കുട്ടികള്‍ക്ക് നേരേ അശ്ലീല പ്രദര്‍ശനം നടത്തിയത്. ഇയാളുടെ ദൃശ്യങ്ങള്‍ പെണ്‍കുട്ടികള്‍ മൊബൈല്‍ ഫോണില്‍ പകര്‍ത്തിയിരുന്നു.
കാലിന് മുടന്തുള്ളയാള്‍ വടി കുത്തിയാണ് തിരുവനന്തപുരത്തുനിന്ന് തീവണ്ടിയില്‍ കയറിയതെന്ന് പെണ്‍കുട്ടികളിലൊരാള്‍ പറഞ്ഞു.
ശൗചാലയത്തിനു സമീപം നിന്ന സഹോദരിയെ നോക്കിയാണ് ഇയാള്‍ ആദ്യം അശ്ലീലപ്രദര്‍ശനം നടത്തിയത്. ഇത് അവള്‍ മൊബൈലില്‍ പകര്‍ത്തി.
തുടര്‍ന്ന് ആ ഫോണ്‍ തനിക്ക് കൈമാറിയതോടെയാണ് സംഭവം താന്‍ ശ്രദ്ധിക്കുന്നതെന്നും വീഡിയോ പകര്‍ത്തിയെന്ന് മനസ്സിലാക്കിയ അയാള്‍ കഴക്കൂട്ടം സ്റ്റേഷനില്‍ ഇറങ്ങി മറ്റൊരു ബോഗിയില്‍ കയറിയെന്നും പിന്നീട് വര്‍ക്കല സ്റ്റേഷനില്‍ ഇറങ്ങിയെന്നും പെണ്‍കുട്ടി പറയുന്നു.
ഭിന്നശേഷിക്കാരനായ പ്രതിയുടെ ദൃശ്യങ്ങള്‍ ലഭിച്ചതോടെ റെയില്‍വേ പോലീസ് സ്വമേധയാ കേസെടുത്ത് അന്വേഷണം ആരംഭിച്ചു.
റെയില്‍വേ സ്റ്റേഷനിലെ സിസിടിവി ദൃശ്യങ്ങള്‍ കേന്ദ്രീകരിച്ച് പ്രതിയെ ഉടന്‍തന്നെ ഇയാളെ പിടികൂടാനാകുമെന്നാണ് പോലീസിന്റെ പ്രതീക്ഷ.
