കോട്ടയം: ജില്ലയിൽ ഇന്നലെ നിരോധിത പുകയില വിൽപന കേന്ദ്രങ്ങളിൽ പോലീസ് നടത്തിയ വ്യാപകമായ റെയ്ഡിൽ വൻ തോതിൽ നിരോധിത പുകയില ഉത്പന്നങ്ങൾ പിടികൂടി. സ്ത്രീ അടക്കം ഏഴു പേരെ അറസ്റ്റ് ചെയ്തു. ജില്ലാ പോലീസ് മേധാവിയുടെ നിർദേശാനുസരണമായിരുന്നു റെയ്ഡ്. ചിങ്ങവനം സ്റ്റേഷൻ പരിധിയിൽ നടന്ന റെയ്ഡിൽ കോടിമത പഴയ എംസി റോഡ് ഭാഗത്ത് മഠത്തിപ്പറന്പിൽ ദിവാകരൻ മകൻ സുജേഷ് (35)എന്നയാളുടെ വീടിനോട് ചേർന്നുള്ള കടയിൽ നിന്നും 3930 പായ്ക്കറ്റ് ഹാൻസും 250 പായ്ക്കറ്റ് കൂളും പിടിച്ചെടുത്തു.
എസ് ഐ സനൽ, അഡീഷണൽ എസ് ഐ ഡേവിഡ്സണ്‍, എ എസ് ഐ ആനന്ദ് അമൃത്‌ ര‌‌ാജ് , ബിജു, സി പി ഒ സന്തോഷ്, സുമേഷ്, സജിമോൻ എന്നിവരുടെ നേതൃത്വത്തിലാണ് റെയ്ഡ് നടത്തിയത്. ചിങ്ങവനം സ്റ്റേഷൻ പരിധിയിൽ നടന്ന മറ്റൊരു റെയ്ഡിൽ കുറിച്ചി നാല്പതാം കവല ഭാഗത്ത് സതീഷ് ഭവനിൽ സുകുമാരന്‍റെ കടയിൽനിന്നും 514 പായ്ക്കറ്റ് ഹാൻസ് പിടിച്ചെടുത്തു. ഇന്നലെ രാത്രി എട്ടുമണിയോടെയായിരുന്നു റെയ്ഡ്.
കോട്ടയം ഈസ്റ്റ് സ്റ്റേഷൻ പരിധിയിൽ നടന്ന റെയ്ഡിൽ കഞ്ഞിക്കുഴി ഷാപ്പിന് സമീപം പെട്ടിക്കടയിൽ നിരോധിത പുകയില ഉല്പന്നമായ ഹാൻസ് വില്പന നടത്തിയ സ്ത്രീ പിടിയിൽ. മുൻപ് പല പ്രാവശ്യവും ഈ പെട്ടിക്കട കേന്ദ്രീകരിച്ച് കുട്ടികൾക്കും അന്യസംസ്ഥാനക്കാർക്കും മറ്റുമായി ഹാൻസ് വില്പന നടത്തി പിടിയിലായിട്ടുള്ള സുമതി ദിവാകരനാ (70) ണ് പിടിയിലായത്. 10 പാക്കറ്റ് ഹാൻസ് പിടിച്ചെടുത്തു. ഈസ്റ്റ് സ്റ്റേഷനിൽ ഇവർക്കെതിരെ കേസെടുത്തു.
ഈസ്റ്റ് എസ്എച്ച്ഒ ബൈജു, അഡീഷണൽ എസ്ഐ ബിനോയി, സി പി ഒ ദിലീപ് വർമ്മ, വനിതാ സി പി ഒ ലാസ്മിൻ തുടങ്ങിയവരാണ് പ്രതിയെ അറസ്റ്റ് ചെയ്തത്.കുമരകം സ്റ്റേഷൻ പരിധിയിൽ അമ്മങ്കരി ഭാഗത്തുനിന്ന് 14 പായ്ക്കറ്റ് ഹാൻസുമായി അമ്മങ്കെരി പുത്തൻപറന്പിൽ വൈശാഖ(54)നെ അറസ്റ്റ് ചെയ്തു. കുട്ടികൾക്കും മറ്റും വില്പന നടത്തുന്നതിനായി കുമരകം അമ്മങ്കരി ഭാഗത്തുള്ള തന്‍റെ വീടിനടുത്തുള്ള മാടക്കടയ്ക്കു വെളിയിലുള്ള തട്ടിനടിയിൽ ഒരു പ്ലാസ്റ്റിക് കൂടിനുള്ളിൽ സൂക്ഷിച്ചുവച്ചിരിക്കുകയായിരുന്നു.
എസ് ഐ ഷിബു , സി പി ഒ ശശി എന്നിവരുടെ നേതൃത്വത്തിലാണ് റെയ്ഡ് നടത്തിയത്. വെള്ളൂർ സ്റ്റേഷൻ പരിധിയിൽ നടന്ന റെയ്ഡിൽ കീഴൂർ കവലയിലുള്ള ചായക്കടയിൽ ഇന്നലെ 30 പായ്ക്കറ്റ് ഹാൻസുമായി കീഴൂർ പുത്തൻതറയിൽ മോഹനനെ(62 ) പിടികൂടി. ഇയാൾക്കെതിരെ കേസ് രജിസ്റ്റർ ചെയ്തു. എസ്ഐ രഞ്ജിത് വിശ്വനാഥന്‍റെ നേതൃത്വത്തിലുള്ള സംഘമാണ് റെയ്ഡ് നടത്തിയത്.
കുറവിലങ്ങാട് സ്റ്റേഷൻ പരിധിയിൽ നടന്ന റെയ്ഡിൽ കുറവിലങ്ങാട് മുട്ടുങ്കൽ ഭാഗത്തു സംഗീത സ്റ്റോഴ്സ് നടത്തുന്ന കോഴ തെങ്ങുംതൈക്കൽ തന്പി(53 ) എന്ന ആളിന്‍റെ കടയിൽ നിന്നും 16 പാക്കറ്റ് ഹാൻസ് പിടിച്ചെടുത്തു. എസ്എച്ച്ഒ ദീപുവിന്‍റെ നേതൃത്വത്തിലുള്ള സംഘമാണ് റെയ്ഡ് നടത്തിയത്.
വൈക്കം സ്റ്റേഷൻ പരിധിയിൽ നടന്ന റെയ്ഡിൽ അംബിക മാർക്കറ്റ് റോഡിൽ സെന്‍റ് മൈക്കിൾ സ്കൂളിന് സമീപമുള്ള കടയിൽ നിന്ന് പുകയില ഉത്പന്നങ്ങൾ പിടികൂടി. എസ് ഐ മഞ്ജുദാസിന്‍റെ നേതൃത്വത്തിലുള്ള സംഘമാണ് റെയ്ഡ് നടത്തിയത്.
