തിരുവനന്തപുരം: ബജറ്റ് അവതരണദിനം നിയമസഭയിലെത്തിയ മുഖ്യമന്ത്രി പിണറായി വിജയൻ നേരെ നടന്നു പോയത് പ്രതിപക്ഷ നിരയിലേക്കായിരുന്നു. പ്രതിപക്ഷത്തു മുൻനിരയിലിരുന്ന കേരള കോൺഗ്രസ് -എം ചെയർമാൻ കെ.എം. മാണിയുടെ അടുത്തെത്തി മുഖ്യമന്ത്രി ജന്മദിനാശംസകൾ നേർന്നു. ബുധനാഴ്ച ആയിരുന്നു കെ.എം. മാണിയുടെ ജന്മദിനം.
രാവിലെ എട്ടേമുക്കാലോടെ സഭയിലെത്തിയ കെ.എം. മാണിക്ക് ഭരണ- പ്രതിപക്ഷ വ്യത്യാസമില്ലാതെ അംഗങ്ങൾ ആശംസകൾ നേർന്നു. ബജറ്റ് അവതരിപ്പിക്കുന്നതിനായി സഭയിലെത്തിയ ധനമന്ത്രി ഡോ. തോമസ് ഐസക്കും നേരെ പോയത് കെ.എം. മാണിയുടെ അടുത്തേക്കാണ്.
മന്ത്രി കെ. കൃഷ്ണൻകുട്ടിയും പ്രതിപക്ഷ നേതാവ് രമേശ് ചെന്നിത്തല ഉൾപ്പെടെയുള്ള പ്രതിപക്ഷാംഗങ്ങളും മാണിയുടെ അടുത്തെത്തി സ്നേഹാംശകൾ നേർന്നു. പി.സി. ജോർജ് ആശംസകൾ നേരാനെത്തിയത് കൗതുകമുണർത്തി. ബജറ്റ് ദിനത്തിൽ സഭയിൽ ശ്രദ്ധാകേന്ദ്രമായത് കെ.എം. മാണിയായിരുന്നു.
