ലക്നോ: യുപിയിലെ ഹത്രാസില്‍ പീഡനത്തിന് ഇരയായി കൊല്ലപ്പെട്ട പെണ്‍കുട്ടിയുടെ ബന്ധുക്കളെ നുണ പരിശോധനയ്ക്ക് വിധേയരാക്കും. ഇത് സംബന്ധിച്ച് യുപി സര്‍ക്കാര്‍ ഉത്തരവിട്ടു.
നേരത്തെ പെൺകുട്ടി പീഡനത്തിന് ഇരയായിട്ടില്ലെന്ന് റിപ്പോർട്ട് വന്നിരുന്നു. ഇതിന് പിന്നാലെയാണ് പ്രത്യേക അന്വേഷണ സമിതിയുടെ പ്രാഥമിക അന്വേഷണ റിപ്പോര്‍ട്ട് പ്രകാരം നുണ പരിശോധന നടത്താൻ ഉത്തരവിറക്കിയത്.
പെണ്‍കുട്ടിയുടെ കുടുംബം കനത്ത പോലീസ് വലയത്തിലാണ്. അഭിഭാഷകരോടൊ മാധ്യമങ്ങളോടോ സംസാരിക്കാന്‍ സാധിക്കാത്ത വിധം ഇവരെ വീട്ടുതടങ്കലില്‍ ആക്കിയിരിക്കുകയാണ്.
അതേസമയം, സംഭവത്തില്‍ മുഖംരക്ഷിക്കാനുള്ള നടപടിയുമായി യുപി സര്‍ക്കാര്‍ രംഗത്തെത്തി. കേസില്‍ വീഴ്ച വരുത്തിയെന്ന റിപ്പോര്‍ട്ടിന്‍റെ അടിസ്ഥാനത്തില്‍ പോലീസുകാരെ സസ്‌പെന്‍ഡ് ചെയ്തു.
എസ്പി വിക്രാന്ത് വീര്‍, ഡിഎസ്പി റാം ഷബ്ദ്, ഇന്‍സ്‌പെക്ടര്‍ ദിനേഷ് കുമാര്‍ വര്‍മ, എസ്‌ഐ ജയ് വീര്‍ സിംഗ്, ഹെഡ് കോണ്‍സ്റ്റബിള്‍ മഹേഷ് പാല്‍ എന്നിവര്‍ക്കെതിരെയാണ് നടപടി.
