മലയോര ജനതയുടെ സ്വപ്‌നമായ മലയോര ഹൈവേയിൽ കോഴിക്കോട് ജില്ലയിലെ ആദ്യ റീച്ച് ഉദ്ഘാടനത്തിന് ഒരുങ്ങുന്നു. കോടഞ്ചേരി മുതൽ കക്കാടംപൊയിൽ വരെയുള്ള 34.3 കിലോമീറ്ററാണു ഫെബ്രുവരി 15ന് മുഖ്യമന്ത്രി പിണറായി വിജയൻ നാടിന് സമർപ്പിക്കുന്നത്. 2020 ഓഗസ്റ്റ് 11ന് ആണു റോഡ് നിർമാണം അന്നത്തെ മന്ത്രി ജി. സുധാകരൻ ഉദ്ഘാടനം ചെയ്തത്.
24 മാസം ആയിരുന്നു നിർമാണ കാലാവധി. കോവിഡും ചില മേഖലകളിൽ സ്ഥലം വിട്ടുകിട്ടാനുള്ള കാലതാമസവും കാരണം നിർമാണം രണ്ടരവർഷം വൈകി.155 കോടി രൂപയ്ക്ക് ഊരാളുങ്കൽ ലേബർ സൊസൈറ്റി ആണ് റോഡ് നിർമാണ കരാർ ഏറ്റെടുത്തത്. റോഡിന് ഇരുവശത്തും സൗജന്യമായാണു ജനങ്ങൾ നവീകരണത്തിനു സ്ഥലം വിട്ടുകൊടുത്തത്12 മീറ്റർ വീതിയുള്ള റോഡിൽ ബിഎം-ബിസി നിലവാരത്തിലുള്ള ടാറിംഗാണ്.
ഇരുവശങ്ങളിലും പൂട്ടുകട്ട വിരിച്ചു. റോഡിന്‍റെ വശങ്ങളിൽ തെരുവുവിളക്കുകൾ സ്ഥാപിച്ചു. ഇരു വശങ്ങളിലും ഓട, ഭൂഗർഭ കേബിളുകളും പൈപ്പുകളും കടന്നു പോകാനുള്ള കോൺക്രീറ്റ് ചാലുകൾ, കാര്യേജ് വേ, പ്രധാന കവലകളിൽ പൂട്ടുകട്ട പാകിയ നടപ്പാതകൾ, സൗരോർജ വിളക്കുകൾ, ട്രാഫിക് സിഗ്നൽ ലൈറ്റുകൾ, ബസ് കാത്തിരിപ്പ് കേന്ദ്രങ്ങൾ എന്നിവയുണ്ട്.മലയോര ഹൈവേ ഹൈ ടെക് ആയെങ്കിലും ഇതിലെ 4.44 കിലോമീറ്റർ ദൂരം ഇപ്പോഴും പഴയ റോഡാണ്ഉപയോഗിക്കുന്നത്.
അലൈന്‍മെന്‍റ് മാറ്റി നിര്‍മാണം
മേലേ കൂമ്പാറ– ആനക്കല്ലുംപാറ– താഴെ കക്കാട് ഭാഗത്ത് ഇപ്പോഴും നിർമാണം തുടങ്ങിയിട്ടില്ല.ഇതിനു പകരം നേരത്തെയുള്ള പീടികപ്പാറ– താഴെ കക്കാട് റോഡ് ആണ് ഉപയോഗിക്കുന്നത്. ഇത്രയും ദൂരം റീ ടാറിംഗ് നടത്തി എന്നതല്ലാതെ മലയോര ഹൈവേയുടെ നിലവാരം ഈ ഭാഗത്തില്ല.അലൈൻമെന്‍റിലെ വ്യത്യാസമാണ് ഇവിടെ മലയോര ഹൈവേ മുറിഞ്ഞു പോകാൻ കാരണം. ആനക്കല്ലുംപാറ ജംഗ്ഷനില്‍നിന്ന് അകമ്പുഴ–താഴെ കക്കാട് എത്തുന്ന വിധത്തിൽ റോഡിന്‍റെഅലൈൻമെന്‍റ് പിന്നീട് മാറ്റുകയായിരുന്നു. അകമ്പുഴ വഴിയുള്ള 7.22കിലോമീറ്റർ ഗ്രാമീണ റോഡ് നിർമാണത്തിന് 26.25 കോടി രൂപ വകയിരുത്തിയിട്ടുണ്ടെങ്കിലും നടപടി ക്രമങ്ങൾ തുടരുകയാണ്
ആലപ്പുഴ ഒഴികെയുള്ള 13 ജില്ലകളിലൂടെ…
ആലപ്പുഴ ഒഴികെ 13 ജില്ലയിലൂടെയാണ് ഹൈവേ കടന്നുപോകുന്നത്. കാസർകോട് നന്ദാരപ്പദവ് നിന്ന് തുടങ്ങി തിരുവനന്തപുരം പാറശാലയിൽ അവസാനിക്കും. സംസ്ഥാനത്തെ 13 ജില്ലകളെ ബന്ധിപ്പിച്ച് കടന്നുപോകുന്ന പ്രധാന പാതയാണ് മലയോര ഹൈവേ. മലയോരത്തേക്ക് അതിവേഗ യാത്ര സാധ്യമാകുന്നതിനൊപ്പം ചരക്കുനീക്കത്തിനും ഹൈവേ പൂർത്തിയാകുന്നതോടെ അവസരം ഒരുങ്ങും.
കോഴിക്കോട് ജില്ലയിൽ വിലങ്ങാട് – കൈവേലി – കായക്കൊടി – കുറ്റ്യടി – മരുതോങ്കര – പെരുവണ്ണാമൂഴി – ചക്കിട്ടപാറ – നരിനട – കൂരാച്ചുണ്ട് – കല്ലാനോട് – തലയാട് – കട്ടിപ്പാറ – മലപുറം – കോടഞ്ചേരി – തിരുവമ്പാടി – കൂടരഞ്ഞി – കൂമ്പാറ – കക്കാടംപൊയിൽ എന്നിവിടങ്ങളിലൂടെയാണ് മലയോര ഹൈവേ കടന്നുപോകുന്നത്. 1,166.27 കിലോ മീറ്റർ ദൈർഘ്യമുള്ള മലയോര ഹൈവേയുടെ 793.68 കിലോ മീറ്റർ ആണ് കിഫ്ബി ഫണ്ട് ഉപയോഗിച്ച് നിർമിക്കുന്നത്. 188 കിലോമീറ്റർ റോഡിന്‍റെ പ്രവൃത്തി പൂർത്തിയായി. 250 കിലോമീറ്റർ ഡിസംബറോടെ പൂർത്തിയാകും. ഇതുവരെ 3,593 കോടി രൂപയുടെ സാമ്പത്തികാനുമതി കിഫ്ബിയിൽനിന്നും അനുവദിച്ചു. ഇതിൽ 1,288 കോടിയുടെ പ്രവൃത്തികളാണ് പൂർത്തിയായത്.
ബാക്കി വരുന്ന 372.59 കിലോ മീറ്റർ റോഡിന്‍റെ നിർമാണം കെഎസ്ടിപി. (കേരള സ്റ്റേറ്റ് ട്രാൻസ്പോർട് പ്രൊജക്റ്റ്), ദേശീയപാത അതോറിറ്റി, പൊതുമരാമത്ത് വകുപ്പ് എന്നിവയുടെ കീഴിലാണ്. ആകെ 99 കിലോമീറ്റർ റോഡാണ് ഇതിൽ ദേശീയ പാതാ അതോറിറ്റിക്ക് കീഴിൽ വരുന്നത്. മലയോര ഹൈവേ പല സ്ഥലങ്ങളിലും ദേശീയ പാതയെ ഓവർലാപ് ചെയ്ത് പോകുന്നതിനാലാണിത് (മലയോര ഹൈവേ ഓവർലാപ് ചെയ്യുന്ന ദേശീയ പാതകളുടെ ആകെ നീളമാണ് 99 കിലോ മീറ്റർ).
മലയോര ഹെവേ ആശയത്തിന് 28 വര്‍ഷത്തെ പഴക്കം
1997-ലാണ് മലയോര ഹൈവേ എന്ന ആശയം ആദ്യമായി മുന്നോട്ട് വച്ചത്. 2000-ൽ സംസ്ഥാന സർക്കാർ ഈ പാതയെ സംസ്ഥാന പാതയായി പ്രഖ്യാപിച്ചു. തുടർന്ന്, നാറ്റ്പാക് വിശദമായ പഠനം നടത്തുകയും 1,267 കിലോ മീറ്റർ നീളത്തിൽ പാതയുടെ അലൈൻമെന്‍റ് തയാറാക്കുകയും ചെയ്തു. പിന്നീട് മെല്ലപ്പോക്കിലായ പദ്ധതിക്ക് ഒന്നാം പിണറായി വിജയൻ സർക്കാരിന്‍റെ കാലത്താണ് പുതുജീവൻ വെച്ചത്. വിവിധ സ്ഥലങ്ങളിലെ എതിർപ്പുകൾ കാരണം പിന്നീട് അലൈൻമെന്‍റ് പുതുക്കുകയും പാതയുടെ നീളം 1,166.27 കിലോ മീറ്റർ ആയി ക്രമീകരിക്കുകയായിരുന്നു.
സ്വന്തം ലേഖകന്‍
