കുളത്തുപ്പുഴ:തെന്മല ഇക്കോ ടൂറിസം പാലരുവി, കുഭാവുരുട്ടി അടക്കമുള്ള വിനോദ സഞ്ചാര മേഖലയില്‍ എത്തുന്നവര്‍ക്ക് കുളത്തുപ്പുഴ കേന്ദ്രീകരിച്ചു താമസ സൗകര്യം ഒരുക്കണമെന്ന് മന്ത്രി കെ രാജു ആവശ്യപ്പെട്ടു. മലോയോര മേഖലയില്‍ എത്തുന്ന വിനോദ സഞ്ചാരികള്‍ക്ക് ഏറ്റവും ബുദ്ധിമുട്ട് അനുഭവപ്പെടുന്നത് താമസ സൗകര്യം ഇല്ല എന്നതാണ്.
ടൂറിസം വകുപ്പോ, കെടിഡിസിയോ മുന്‍കൈയെടുത്ത് കുളത്തുപ്പുഴ കേന്ദ്രീകരിച്ചു ഒരു ഹോട്ടലോ ഐബിയോ ആരംഭിക്കണമെന്നും കെ രാജു ആവശ്യപ്പെട്ടു.കുളത്തുപ്പുഴ ശ്രീധര്‍മ്മ ശാസ്താക്ഷേത്രത്തില്‍ ഇടത്താവളം ആക്കി ഉയര്‍ത്തുന്നതിന് വേണ്ട നടപടികള്‍ ദേവസ്വംബോര്‍ഡ് അധികൃതരുടെ ഭാഗത്ത് നിന്നും ഉണ്ടാകണം എന്നും അദ്ദേഹം ആവശ്യപ്പെട്ടു.
അതെ സമയം ആവശ്യമായ ഭൂമി ലഭ്യമാക്കിയാല്‍ ഹോട്ടലോ താമസ സൗകര്യമോ ഒരുക്കുന്ന കാര്യം കെടിഡിസിയോ ടൂറിസം വകുപ്പോ ആലോചിക്കുമെന്ന് മന്ത്രി കടകംപള്ളി സുരേന്ദ്രന്‍ ഉറപ്പ് നല്‍കി. കുളത്തുപ്പുഴയില്‍ പൊതുപരിപാടിയില്‍ പങ്കെടുക്കാന്‍ എത്തിയതായിരുന്നു മന്ത്രിമാര്‍.
