കൊച്ചി: സ്പായുടെ മറവില്‍ അനാശാസ്യകേന്ദ്രം നടത്തിയിരുന്ന കുപ്രസിദ്ധ ഗുണ്ടാ നേതാവ് ഭായ് നസീറിനെ തേടി പോലീസ്. ഓള്‍ഡ് കതൃക്കടവ് റോഡിലുള്ള ഓള്‍ഗാ ഹോംസ്‌റ്റേയെന്ന സ്ഥാപനം കഴിഞ്ഞ രണ്ടിന് എറണാകുളം നോര്‍ത്ത് പോലീസ് റെയ്ഡ് ചെയ്തിരുന്നു.
ഇവിടെ അനാശാസ്യ പ്രവര്‍ത്തനങ്ങളില്‍ ഏര്‍പ്പെട്ടിരുന്ന തിരുവനന്തപുരം ശ്രീകാര്യം സ്വദേശി സജിമോന്‍ (45), മലപ്പുറം പൊന്നാനി സ്വദേശി ഫൈസല്‍ ഹമീദ് (34), മലപ്പുറം സ്വദേശി കെ.ഷിജില്‍ (29), പാലക്കാട് തൃക്കണ്ടേരി സ്വദേശി പി. നിഷാദ്(36), കണ്ണൂര്‍ സ്വദേശി വിപിന്‍ദാസ് (36), മലപ്പുറം ചേലാമ്പ്ര സ്വദേശി നൗഫല്‍ ഖാന്‍ (27), തിരുവല്ല സ്വദേശി വി.കെ. വിനീത് (38), കൊല്ലം പത്തനാപുരം സ്വദേശി പി. വിനു (29) എന്നിവരാണ് അന്ന് അറസ്റ്റിലായത്.
ഇവര്‍ക്കൊപ്പം രണ്ട് ഉത്തരേന്ത്യന്‍ സ്വദേശിനികളും ഒരു കൊല്ലം സ്വദേശിനിയും ഉണ്ടായിരുന്നു.സ്ഥാപനം നടത്തിപ്പിനായി നസീര്‍ മുതല്‍ മുടക്കി എന്നു കണ്ടെത്തിയതിനെത്തുടര്‍ന്ന് അന്നുതന്നെ ഇയാളെ പോലീസ് പ്രതി ചേര്‍ത്തിരുന്നു.
എന്നാല്‍ സംഭവത്തിനുശേഷം ഒളിവില്‍ പോയ ഗുണ്ട നേതാവിനെ ഇതുവരെ കണ്ടെത്താന്‍ കഴിഞ്ഞിട്ടില്ല. ഇയാളെ കണ്ടെത്തുന്നതിനായി പോലീസ് അന്വേഷണം ഊര്‍ജിതമാക്കിയിരിക്കുകയാണ്. ഒമ്പതു മാസം മുമ്പാണ് മൂന്നു നിലയിലുള്ള കെട്ടിടത്തില്‍ സ്പായും ഹോം സ്‌റ്റേയും പ്രവര്‍ത്തനം തുടങ്ങിയത്.
