താരങ്ങൾക്കെല്ലാം വലിയ ആരാധകവൃന്ദമുണ്ടാകും. അതുകൊണ്ടു തന്നെ പൊതുസ്ഥലങ്ങളിൽ ഇവർക്കു സ്വതന്ത്രമായി സഞ്ചരിക്കാൻ കഴിയില്ല. ചുറ്റും കൂടുന്ന ആരാധകർ ചിലപ്പോഴെങ്കിലും ഇവർക്കു ബുദ്ധിമുട്ടുകളും സൃഷ്ടിക്കാറുണ്ട്.
ഇപ്പോഴിതാ അത്തരത്തിലൊരു അനുഭവം പങ്കുവച്ചിരിക്കുകയാണ് നടി ഹണി റോസ്. ഷോപ്പിംഗ് വളരെ ഇഷ്ടമുള്ള ഹണി റോസ് ആരും ശ്രദ്ധിക്കാതിരിക്കാന്‍ പര്‍ദ്ദയിട്ട് ലുലു മാളില്‍ പോയ കഥയാണ് പങ്കുവച്ചിരിക്കുന്നത്. ഒരഭിമുഖത്തിലാണ് ഹണി റോസ് മനസ് തുറന്നത്.
ഞാന്‍ ലുലുവില്‍ സ്ഥിരം കറങ്ങുന്ന ആളാണ്. ഷോപ്പിങ് ഭയങ്കര ഇഷ്ടമാണ്. എന്നാല്‍ താരമായതിനാല്‍ തന്നെ ആളുകള്‍ തിരിച്ചറിയും. ഇതില്‍ നിന്നും രക്ഷപ്പെടാന്‍ എന്‍റെ പക്കലൊരു പൊടി ടെക്നിക്കുണ്ട്. പര്‍ദ്ദയൊക്കെ ഇട്ടാണ് ഞാന്‍ പോകാറ്. അങ്ങനെ ആദ്യമായിട്ട് ഞാന്‍ ലുലുവില്‍ പര്‍ദ്ദയിട്ട് നടക്കുകയാണ്.
അച്ഛനും അമ്മയും വേറെ എവിടെയോ ഷോപ്പ് ചെയ്യുന്നു. ഞാനിപ്പോള്‍ വരാമെന്ന് പറഞ്ഞ് ഇങ്ങനെ നടക്കുകയാണ്. അപ്പോൾ ആരും നമ്മളെ ശ്രദ്ധിക്കുകയൊന്നുമില്ല.
നമുക്ക് എല്ലാവരേയും നോക്കി നടക്കുകയും ചെയ്യാം. പിന്നാലെയാണ് രസകരമായ സംഭവം നടക്കുന്നത്. ഒരു മനുഷ്യന്‍ അടുത്ത് വന്നിട്ട് അസലാമു അലൈക്കും എന്ന് പറഞ്ഞു. തിരിച്ച് എന്തുപറയുമെന്നറിയാതെ ഞെട്ടിയ ഞാന്‍ കൈകൂപ്പി താങ്ക് യൂ എന്ന് തിരിച്ചുപറഞ്ഞു.
പിന്നെ എങ്ങനെയോ അവിടെ നിന്നും ഓടി. ഇങ്ങനെ ആരെങ്കിലും അടുത്ത് വന്ന് പറയുമെന്ന് പ്രതീക്ഷിച്ചിരുന്നില്ല. അതുകൊണ്ട് തന്നെ തിരിച്ച് എന്താണ് പറയേണ്ടതെന്നും പെട്ടെന്ന് കിട്ടിയില്ല. ഇപ്പോള്‍ ആ കാര്യമൊക്കെ മനസിലായെന്നും ഹണി റോസ് പറഞ്ഞു.
– പിജി
