ഭാര്യയുമായോ കാമുകിയുമായോ ഷോപ്പിംഗിനു പോകുന്പോൾ വെറും കാണിയായി നിൽക്കുന്ന ജോലിയാണ് മിക്ക ഭർത്താക്കന്മാർക്കും കാമുകന്മാർക്കും. കുറേ സമയം ഇങ്ങനെ നിന്നു കഴിയുന്പോൾ ഇവർക്ക് ബോറടിക്കാനും തുടങ്ങും. ഇതിനൊരു പരിഹാരവുമായി എത്തിയിരിക്കുകയാണ് ഒരു ഷോപ്പിംഗ് മാൾ. ചൈനയിലെ ഷാംഗ്ഹായിയിലുള്ള ഏറ്റവും വലിയ മാളായ ഗ്ലോബൽ ഹാർബർ മാളിലാണ് “ഹസ്ബൻഡ് റസ്റ്റ് ഹാച്ചസ്’ എന്ന പേരിൽ വിനോദത്തിനായി ഉപകരണം നിർമിച്ചിരിക്കുന്നത്.
ഒരാൾക്ക് മാത്രം ഇരിക്കാൻ കഴിയുന്ന ഈ ഉപകരണത്തിൽ കയറിയിരുന്ന് ഇവർക്ക് വിനോദത്തിലേർപ്പടാം.കംപ്യൂട്ടർ ഗെയിമുകളുൾപ്പടെയുള്ള വിനോദത്തിലൂടെ ഭാര്യയോ കാമുകിയോ ഷോപ്പിംഗ് കഴിഞ്ഞ് മടങ്ങി വരുന്നതു വരെ മടുപ്പൊന്നും തോന്നാതെ സമയം ചിലവഴിക്കാനും ഇവർക്കു കഴിയും. ഉള്ളിൽ എസി വരെ സ്ഥാപിച്ചിരിക്കുന്ന ഈ ഉപകരണത്തെ ഇഷ്ടപ്പെട്ട് പലരും ഭാര്യമാർക്കൊപ്പം ഷോപ്പിംഗിനായി ഈ മാളിൽ എത്തുന്നുണ്ടെന്നാണ് ലഭിച്ചിരിക്കുന്ന റിപ്പോർട്ടുകൾ. എന്തായാലും തന്നെ ഭർത്താവ് എങ്ങോട്ടും കൊണ്ടു പോകില്ലെന്ന ഭാര്യമാരുടെ പരാതികൾക്ക് ഒരു പരിഹാരം നേടി കൊടുത്തിരിക്കുകയാണ് ഈ ഉപകരണം.
