കോഴിക്കോട്: ഐ ലീഗ് ഫുട്ബോളിൽ കേരളത്തിന്‍റെ സാന്നിധ്യമായ ഗോകുലം കേരള എഫ്സി ഇന്ന് ഹോം മത്സരത്തിനായി കളത്തിൽ. മലബാറിയൻസ് എന്നറിയപ്പെടുന്ന ഗോകുലം ഹോം മത്സരത്തിൽ ഷില്ലോംഗ് ലാജോംഗിനെ നേരിടും. രാത്രി ഏഴിന് കോർപറേഷൻ സ്റ്റേഡിയത്തിലാണ് കിക്കോഫ്.
ലീഗിൽ തുടർച്ചയായ മൂന്നാം ജയമാണ് ഗോകുലത്തിന്റെ ലക്ഷ്യം. കഴിഞ്ഞ രണ്ട് എവേ പോരാട്ടങ്ങളിൽ ശ്രീനിധി ഡെക്കാണിനെയും (4-1) ഇന്‍റർ കാശിയെയും (4-2) മലബാറിയൻസ് കീഴടക്കിയിരുന്നു. ഡിസംബർ രണ്ടിനുശേഷം ഗോകുലം ഹോം ഗ്രൗണ്ടിൽ ഇറങ്ങുന്ന ആദ്യമത്സരമാണ് ഇന്നത്തേത്.
12 മത്സരങ്ങളിൽനിന്ന് 20 പോയിന്റുമായി നാലാം സ്ഥാനത്താണ് ഗോകുലം കേരള. ഇത്രതന്നെ മത്സരങ്ങളിൽനിന്ന് 19 പോയിന്റുമായി ആറാം സ്ഥാനത്താണ് ഷില്ലോംഗ് ലാജോംഗ്. 13 മത്സരങ്ങളിൽ 28 പോയിന്റുള്ള മുഹമ്മദൻസ് എസ്‌സിയാണ് ലീഗിന്‍റെ തലപ്പത്ത്. റിയൽ കാഷ്മീർ (23), ശ്രീനിധി ഡെക്കാണ്‍ (23) ടീമുകളാണ് രണ്ടും മൂന്നും സ്ഥാനങ്ങളിൽ.
