ദുബായ്: ഐസിസി ട്വന്‍റി 20 റാങ്കിംഗിലുള്ള ബാറ്റ്‌സ്മാന്മാരുടെ പട്ടികയില്‍ കെ.എല്‍. രാഹുല്‍ ആറാം സ്ഥാനത്ത്. ആദ്യ പത്തിലുള്ള ഏക ഇന്ത്യക്കാരനും രാഹുലാണ്. ഓസ്‌ട്രേലിയയ്‌ക്കെതിരേ കഴിഞ്ഞ ട്വന്‍റി 20 മത്സരങ്ങളില്‍ 50 റണ്‍സ്്, 47 റണ്‍സ് പ്രകടനങ്ങളാണ് ഇന്ത്യന്‍ ഓപ്പണറെ ആറാമതെത്തിച്ചത്.
അഫ്ഗാനിസ്ഥാന്‍റെ ഹസ്‌റത്തുള്ള സസായ് 31 സ്ഥാനം കടന്ന് ഏഴാം സ്ഥാനത്തെത്തി. സസായിയുടെ ഏറ്റവും ഉയര്‍ന്ന റാങ്കാണിത്. ബൗളര്‍മാരില്‍ ഇന്ത്യന്‍ പേസര്‍ ജസ്പ്രീത് ബുംറ 15-ാം സ്ഥാനത്തുനിന്ന് 12ലെത്തി. എന്നാല്‍ കുല്‍ദീപ് യാദവ് രണ്ടാം സ്ഥാനം നഷ്ടമാക്കി നാലാം സ്ഥാനത്തേക്കു പതിച്ചു.
ഇന്ത്യക്കെതിരേയുള്ള ട്വന്‍റി 20 പരമ്പരയിലെ മികച്ച പ്രകടനത്തില്‍ ഓസ്‌ട്രേലിയയുടെ ഗ്ലെന്‍ മാക്‌സ്‌വെല്‍ മൂന്നാം സ്ഥാനത്തേക്കു കയറി. അയര്‍ലന്‍ഡിനെതിരേ കഴിഞ്ഞ മൂന്നു മത്സര പരമ്പരയിലെ പ്രകടനമാണ് സസായിയെ കരിയറിലെ മികച്ച റാങ്കിംഗിലെത്തിച്ചത്.
