ഡർബൻ: പുരുഷ, വനിതാ ടീമുകൾക്ക് തുല്യ സമ്മാനത്തുക പ്രഖ്യാപിച്ച് ഐസിസി. ദക്ഷിണാഫ്രിക്കയിലെ ഡർബനിൽ നടന്ന ഐസിസി വാർഷിക സമ്മേളനത്തിലാണ് നിർണായക തീരുമാനം.
പുതിയ തീരുമാനമനുസരിച്ച് ഐസിസി ടൂര്‍ണമെന്‍റുകളില്‍ തുല്യ സ്ഥാനത്ത് ഫിനിഷ് ചെയ്യുന്ന പുരുഷ-വനിതാ ടീമുകള്‍ക്ക് തുല്യമായ സമ്മാനത്തുക നല്‍കും.
റണ്ണേഴ്സ് അപ്പ് ആകുന്ന ടീമുകൾക്ക് അടുത്ത ഘട്ടത്തിൽ തുല്യ സമ്മാനത്തുക നൽകുമെന്നും ഐസിസി വ്യക്തമാക്കി.
2017 മുതൽ എല്ലാ വർഷവും വനിതാ മത്സരങ്ങളുടെ സമ്മാനത്തുക ഞങ്ങൾ വർധിപ്പിച്ചിട്ടുണ്ടെന്ന് ഐസിസി ചെയര്‍മാന്‍ ഗ്രെഗ് ബാര്‍ക്ലെ പറഞ്ഞു. ഐസിസി എകദിന ലോകകപ്പ്, ട്വന്‍റി-20 ലോകകപ്പ്, അണ്ടർ 19 ലോകകപ്പ് എന്നിവ നേടുന്ന വനിത ടീമുകൾക്ക് പുരുഷ ടീമുകൾക്ക് നൽകുന്ന അതേ സമ്മാനതുക നൽകുമെന്നും ഗ്രെഗ് പറഞ്ഞു.
