ഇടുക്കി: ഇടുക്കി വെള്ളിയാമറ്റത്ത് ഒഴുക്കിൽപ്പെട്ട കാറിൽനിന്നു യാത്രക്കാരൻ സാഹസികമായി രക്ഷപ്പെട്ടു. വെള്ളിയാമറ്റം പന്നിമറ്റം പഞ്ചായത്തിലെ ചപ്പാത്ത് പാലത്തിൽ വ്യാഴാഴ്ച വൈകിട്ടായിരുന്നു അപകടം. പൂർണമായി വെള്ളത്തിൽ മുങ്ങിയ കാറിൽനിന്നു യാത്രക്കാരൻ രക്ഷപ്പെടുന്നതിന്‍റെ വീഡിയോ സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്.
കഴിഞ്ഞ ദിവസത്തെ മഴയിൽ ചപ്പാത്ത് പാലത്തിൽ ശക്തമായി വെള്ളം കയറി. ഈ പാലത്തിലൂടെ വാഹനങ്ങൾ കടന്നുപോകുന്നുണ്ടായിരുന്നു. എന്നാൽ കാർ കടന്നുപോകവെ അപ്രതീക്ഷിതമായി ജലനിരപ്പ് ഉയരുകയും കാർ കുടുങ്ങുകയും ചെയ്തു. ഇതോടെ വാഹനം തിരിച്ച് കരയിലെത്തിക്കാൻ നാട്ടുകാരും വാഹനത്തിന്‍റെ ഡ്രൈവറും ശ്രമിച്ചെങ്കിലും സാധിച്ചില്ല.
ശക്തമായ കുത്തൊഴുക്കു വന്നതോടെ വാഹനം കൈവരിക്കു മുകളിലൂടെ ഒഴുകി താഴേക്കു പതിച്ചു. എന്നാൽ കാർ പൂർണമായും വെള്ളത്തിൽ മുങ്ങിപ്പോവുന്നതിനു മുന്പ് കാർ ഓടിച്ചിരുന്ന ആൾ വെള്ളത്തിൽനിന്നു രക്ഷപ്പെടുകയായിരുന്നു.
വീഡിയോ കടപ്പാട്: ഏഷ്യാനെറ്റ് ന്യൂസ്‌
