കൊച്ചി: തമിഴ്നാടും കർണാടകയും തമ്മിലുള്ള കാവേരി നദീജല തർക്കം നിലനിൽക്കുന്നതിനാൽ ചെന്നൈ സൂപ്പർ കിംഗ്സ്, റോയൽ ചലഞ്ചേഴ്സ് ബാംഗളൂർ ടീമുകളുടെ മത്സരങ്ങൾക്ക് കേരളം വേദിയായേക്കുമെന്ന് സൂചന.
തിരുവനന്തപുരം ഗ്രീൻഫീൽഡ് സ്റ്റേഡിയത്തിൽ മത്സരം നടത്താൻ സൗകര്യം ആരാഞ്ഞ് ബിസിസിഐയും സൂപ്പർ കിംഗ്സ് ടീം മാനേജ്മെന്‍റും കേരള ക്രിക്കറ്റ് അസോസിയേഷന്റ അഭിപ്രായം ആരാഞ്ഞു.
മത്സരം നടത്താൻ സ്റ്റേഡിയം പൂർണ സജ്ജമാണെന്നാണ് കെസിഎ പ്രസിഡന്‍റ് റോങ്ക്ലിൻ ജോണ് മറുപടി അറിയിച്ചു. ഗ്രീൻഫീൽഡ് സ്റ്റേഡിയത്തെ ചെന്നൈ സൂപ്പർ കിംഗ്സിന്‍റെ ഹോം ഗ്രൗണ്ടായി നിശ്ചയിച്ചുകൊണ്ടാകും മത്സരം കേരളത്തിലേക്ക് മാറ്റുക.
കാവേരി ജലതർക്കം പരിഷ്കരിക്കുന്നതുവരെ ഐപിഎൽ ബഹിഷ്കരിക്കണമെന്ന ആഹ്വാനം തമിഴ്നാട്ടിൽ വ്യാപകമായുണ്ട്. തമിഴ് ജനതയൊന്നാകെ മത്സരത്തിനെതിരെ തിരിഞ്ഞിട്ടുണ്ട്. ഇതേ നിലപാടിലാണ് ഭരണ-പ്രതിപക്ഷ പാർട്ടികളും. ഈ സാഹചര്യത്തിലാണ് മത്സരങ്ങൾ കേരളത്തിലേക്ക് മാറ്റാൻ ആലോചിക്കുന്നത്.
