മലയാള സിനിമയിലെ എക്കാലത്തെയും മികച്ച ഹാസ്യതാരങ്ങളില്‍ ഒരാളാണ് ഇന്ദ്രന്‍സ് എന്നതില്‍ തര്‍ക്കമുണ്ടാവാന്‍ വഴിയില്ല. കോമഡി പ്രകടനത്തിലൂടെ ഓരോ സിനിമയെയും പരിപോഷിപ്പിക്കുന്ന ഇന്ദ്രന്‍സിനെ പക്ഷെ പലപ്പോഴും സിനിമയുടെ ക്ലൈമാക്‌സില്‍ കാണാറില്ല. സിനിമയുടെ ക്ലൈമാക്‌സ് രംഗങ്ങളില്‍ നിന്ന് എന്തുകൊണ്ട് താന്‍ ഒഴിവാക്കപ്പെടുന്നു എന്നതിനേക്കുറിച്ച് ഇപ്പോള്‍ ഇന്ദ്രന്‍സ് മനസു തുറക്കുകയാണ്.
സ്വന്തം രൂപമാണ് ക്ലൈമാക്‌സ് രംഗങ്ങളില്‍ നിന്ന് തന്നെ ഒഴിവാക്കാന്‍ കാരണമെന്നാണ് ഇന്ദ്രന്‍സ് പറയുന്നത്. പ്രത്യേകിച്ചു ഗൗരവമുള്ള സിനിമകളില്‍ നിന്ന്. എപ്പോഴും ചിരിക്കുന്ന സ്വഭാവമാണ് തനിക്ക് വിനയായതെന്നും ഇന്ദ്രന്‍സ് വ്യക്തമാക്കുന്നു. ഇന്ദ്രന്‍സ് ക്ലൈമാക്‌സില്‍ നില്‍ക്കേണ്ട, ചുമ്മാ നിന്നാ മതി പുള്ളി ചിരിക്കും അതോടെ ക്ലൈമാക്‌സിന്റെ സിരിയസ്‌നസ് പോകും എന്നൊക്കെയാണ് സംവിധായകര്‍ പറയുന്നതെന്നും അതു തന്നെ വിഷമിപ്പിച്ചിട്ടുണ്ടെന്നും ഇന്ദ്രന്‍സ് പറയുന്നു. ഒരു സ്വകാര്യചാനലിന് നല്‍കിയ അഭിമുഖത്തിലാണ് ഇന്ദ്രന്‍സ് ഇക്കാര്യങ്ങള്‍ പറഞ്ഞത്.
