ഇന്തോനേഷ്യയിലെ ജക്കാർത്തയിൽ നിന്നും പറന്നുയർന്ന ലയണ്‍ എയർ ഫ്ളൈറ്റ് 610 ഒറ്റ നിമിഷം കൊണ്ട് കടലിൽ തകർന്നു വീണപ്പോൾ ഇല്ലാതായത് ഒരുപാടു പേരുടെ സ്വപ്നങ്ങളും ആഗ്രഹങ്ങളും കടമകളുമാണ്.
ഇപ്പോഴിത ഒരുപിടി നല്ല ഓർമകൾ സമ്മാനിച്ച് തന്നോട് യാത്ര പറഞ്ഞ് ഈ വിമാനത്തിൽ പോയ പ്രിയതമൻ റിയോ നൻഡ പ്രതാമ ഇനി ഒരിക്കലും മടങ്ങി വരില്ലെന്ന സത്യം മനസിനെ പറഞ്ഞ് പഠിപ്പിച്ച് റിയോയുടെ മണവാട്ടിയായി ഒരുങ്ങിയിരിക്കുകയാണ് ഇൻതാൻ സ്യാരി. ഇരുവരുടെയും വിവാഹം നവംബർ 11നാണ് നിശ്ചയിച്ചിരുന്നത്.
കഴിഞ്ഞ 13 വർഷങ്ങളായി പ്രണയത്തിലായിരുന്നു ഇരുവരും. കാത്തിരിപ്പിനൊടുവിൽ വന്നെത്തിയ സുന്ദരദിനം മനോഹരമാക്കുവാൻ തന്‍റെ തോളോടു തോൾ ചേർന്നു നിൽക്കേണ്ടിയിരുന്നവൻ ഇനി ലോകത്തില്ല എന്ന യാഥാർത്ഥ്യം ഇൻതാൻ ഉൾക്കൊണ്ടിരിക്കുകയാണ്.
റിയോയുടെ ഓർമകൾ അമൂല്യ നിധിയായി മനസിൽ സൂക്ഷിക്കുന്ന ഇൻതാൻ, റിയോയ്ക്ക് ഏറെ ഇഷ്ടപ്പെട്ട വിവാഹവസ്ത്രമണിഞ്ഞ് നവവധുവായി ഒരുങ്ങി. ഈ ചിത്രങ്ങൾ ഇൻസ്റ്റഗ്രാമിൽ പങ്കുവെച്ച് ഇൻതാൻ കുറിച്ചു, “വാക്കുകളിൽ എന്‍റെ ദുഖം വിവരിക്കാനാവില്ല. എന്നാൽ ഞാൻ ഇന്ന് നിനക്കായി ചിരിക്കുന്നു. ഞാൻ വിഷമിക്കില്ല. ഞാൻ കരുത്തയായി ഇരിക്കും, നീയെന്നോട് പറഞ്ഞതു പോലെ’.
189 യാത്രക്കാരുമായി ജക്കാർത്തയിൽ നിന്നും പുറപ്പെട്ട ലയണ്‍ എയർ ഫ്ളൈറ്റ് 610 കടലിലാണ് തകർന്നു വീണത്. അപകടത്തിൽ ഒരാൾ പോലും രക്ഷപെട്ടില്ല.
