ഹൈദരാബാദ്: മുംബൈ ഇന്ത്യൻസിനെതിരെ സൺറൈസേഴ്സ് ഹൈദരാബാദിന് ഏഴു വിക്കറ്റ് ജയം. മുംബൈയുടെ 139 റൺസ് വിജയലക്ഷ്യം ഹൈദരാബാദ് 10 പന്ത് ബാക്കിനിൽക്കെ മറികടന്നു. ഓപ്പണർ ശിഖർ ധവാൻ (63) പുറത്താകാതെ നേടിയ അർധ ശതകമാണ് ഹൈദരാബാദിന് അനായാസ ജയം നൽകിയത്.
തുടക്കത്തിലെ വാർണറെ നഷ്ടമായെങ്കിലും മൂന്നാം വിക്കറ്റിൽ മോയിസ് ഹെൻട്രിക്സ് (44) ധവാൻ കൂട്ടുകെട്ട് മുംബൈയുടെ ജയപ്രതീക്ഷകളെ തല്ലിക്കെടുത്തി. നേരത്തെ ക്യാപ്റ്റൻ രോഹിത് ശർമയുടെ (67) അർധശതകത്തിന്‍റെ ബലത്തിലാണ് മുംബൈ മാന്യമായ സ്കോർ നേടിയത്.
രോഹിതിനെ കൂടാതെ മുംബൈ നിരയിൽ പാർഥിവ് പട്ടേലും (23) ഹാര്‌ദിക് പാണ്ഡ്യയും മാത്രമാണ് രണ്ടക്കം കടന്നത്. നാല് ഓവറിൽ 24 റൺസ് മാത്രം വഴങ്ങി മൂന്ന് വിക്കറ്റ് വീഴ്ത്തിയ സിദ്ധാർഥ കൗളാണ് മുംബൈയെ തകർത്തത്.ഏഴാം ജയത്തോടെ സൺറൈസസ് ഹൈദരാബാദ് പ്ലേ ഓഫ് സാധ്യത സജീവമാക്കി. ഇതോടെ ഡൽഹി ഡെയർഡെവിൾസിന്‍റെ പ്ലേ ഓഫ് സാധ്യത അടഞ്ഞു.
