തെലുങ്ക് ഫാസ്റ്റ് നമ്പറിന് ചുവടു വച്ച് മലയാളി താരം റെബ മോണിക്ക ജോൺ. മാഡ് സ്ക്വയർ എന്ന തെലുങ്കു ചിത്രത്തിലാണ് റെബയുടെ ഐറ്റം ഡാൻസ് നമ്പർ. അസാധ്യ മെയ്‍വഴക്കത്തോടെ ചടുലനൃത്തം ചെയ്ത് പ്രേക്ഷകരുടെ കൈയടി നേടുകയാണ് താരം.
കഴിഞ്ഞ ദിവസം റിലീസ് ചെയ്ത ഗാനം ട്രെൻഡിംഗ് ചാർട്ടിൽ മുൻപിലുണ്ട്.കല്യാൺ ശങ്കർ തിരക്കഥ എഴുതി സംവിധാനം ചെയ്യുന്ന ചിത്രത്തിൽ ഭീംസ് സസിർലയോ ഈണം പകർന്ന ഗാനമാണ് സ്വാതി റെഡ്ഢി. ഭീംസും സ്വാതി റെഡ്ഢിയും ചേർന്നാണ് ഗാനം ആലപിച്ചിരിക്കുന്നത്.
സുരേഷ് ഗാംഗുലയുടേതാണ് വരികൾ.തെലുങ്കിലെ ഈ ഫാസ്റ്റ് നമ്പറിന്‍റെ പ്രധാന ആകർഷണം റെബയുടെ ചുവടുകളാണ്. റെബ ഇത്ര നന്നായി നൃത്തം ചെയ്യുമായിരുന്നോ എന്നാണ് ആരാധകരുടെ അദ്ഭുതം. പാട്ടിന്‍റെ റീലുകളെല്ലാം സമൂഹമാധ്യമങ്ങളിൽ വൈറലാണ്. ഇത്രയും പ്രതീക്ഷിച്ചില്ലെന്നാണ് റെബയുടെ ആരാധകർ കമന്‍റ് ചെയ്യുന്നത്.
ജേക്കബിന്‍റെ സ്വർഗരാജ്യത്തിൽ നിവിൻ പോളിയുടെ നായികയായി മലയാളത്തിൽ അരങ്ങേറ്റം കുറിച്ച റെബ മോണിക്ക ജോൺ മലയാളത്തിലും തമിഴിലും എണ്ണത്തിൽ വളരെ കുറവ് ചിത്രങ്ങളെ അഭിനയിച്ചിട്ടുള്ളൂ . തമിഴിൽ ജാരുഗണ്ടി ആയിരുന്നു അരങ്ങേറ്റ ചിത്രം. വിജയ് ചിത്രം ബിഗിലിലെ അനിത എന്ന റെബയുടെ കഥാപാത്രം ഏറെ ശ്രദ്ധിക്കപ്പെട്ടു.
