കൊച്ചി: കൊറോണ ബാധയുടെ പശ്ചാത്തലത്തില്‍ കേരളത്തിലേക്ക് മടങ്ങാനാകാതെ ഇറ്റലയിലെ മലയാളികൾ.
നാട്ടിലേക്ക് മടങ്ങുന്നതിനായി ഫുമിച്ചിനോ എയര്‍പോര്‍ട്ടിലെത്തിയ നാല്‍പതോളം മലയാളികളാണ് ഇന്ത്യന്‍ സര്‍ക്കാര്‍ യാത്രയ്ക്ക് തടസം നില്‍ക്കുന്നുവെന്ന വിമാനക്കമ്പനിയുടെ വിശദീകരണത്തെത്തുടര്‍ന്ന് കുടുങ്ങിയത്.
ഇതോടെ നിസഹായവസ്ഥ ചൂണ്ടിക്കാട്ടി ഇവര്‍ നാട്ടിലുള്ള ബന്ധുക്കള്‍ക്കും സൃഹൃത്തുക്കള്‍ക്കും വീഡിയോ സന്ദേശം അയച്ചു. ‘സുഹൃത്തുക്കളെ, ഞങ്ങള്‍ ഇറ്റലിയില്‍ നിന്നാണ്. വിമാനടിക്കറ്റ് എടുത്തിട്ട് ഞങ്ങള്‍ക്കു കേരളത്തിലേക്ക് കയറാന്‍ പറ്റുന്നില്ല.
ഇന്ത്യന്‍ സര്‍ക്കാര്‍ സമ്മതിക്കുന്നില്ലെന്നാണ് ഇറ്റലിയിലെ സര്‍ക്കാര്‍ പറയുന്നത്. പ്രവാസികളായ ഞങ്ങള്‍ എവിടേക്കാണ് പോകേണ്ടതെന്ന് നിങ്ങള്‍ പറയൂ…
തുടങ്ങിയ കാര്യങ്ങളാണ് വീഡിയോ സന്ദേശത്തില്‍ അവര്‍ പങ്കുവച്ചിട്ടുള്ളത്.
കൊച്ചുകുട്ടികളും ഗര്‍ഭിണികളും ഉള്‍പ്പെടെയുള്ളവര്‍ ഇക്കൂട്ടത്തിലുണ്ട്. എറണാകുളം, പുത്തന്‍വേലിക്കര, മാള, തൃശൂര്‍ സ്വദേശികളാണ് ഇവരില്‍ ഭൂരിഭാഗവും.
