തിരുവനന്തപുരം: ചോദ്യം ചെയ്തതിന്‍റെ പേരില്‍ ജലീല്‍ എന്തിനാണ് രാജിവയ്‌ക്കേണ്ടതെന്ന് സിപിഎം നേതാവ് എം.വി. ഗോവിന്ദന്‍. കേസ് വന്നാലും ജലീല്‍ രാജി വയ്‌ക്കേണ്ടതില്ലെന്നും മന്ത്രി സുതാര്യത പുലര്‍ത്തിയെന്നും അദ്ദേഹം മാധ്യമങ്ങളോടു പറഞ്ഞു.
കേസില്‍ എന്‍ഐഎ അന്വേഷണം തുടരട്ടെ. പരിപക്വമായ സാഹചര്യം വരുമ്പോള്‍ പരിപക്വമായി പ്രതികരിക്കും. ഇപ്പോള്‍ രാജി വയ്‌ക്കേണ്ട സാഹചര്യമില്ല. ഈ കേസില്‍ ഒന്നാം പ്രതിയാകേണ്ടത് വി. മുരളീധരനാണ്. ഇപ്പോഴും അയാള്‍ പറയുന്നത് യുഎഇ കോണ്‍സുലേറ്റുമായി ബന്ധപ്പെട്ട ലഗേജ് അല്ലെന്നാണ്.
രണ്ടാമത്തെ ആള്‍ അനില്‍ നമ്പ്യാരാണ്. അന്വേഷണം ശരിയായ ദിശയിലാണെങ്കില്‍ ഇവരിലേക്കും അന്വേഷണം എത്തുമെന്നും എം.വി. ഗോവിന്ദന്‍ വ്യക്തമാക്കി.
അതേസമയം, സ്വർണക്കടത്തു കേസുമായി ബന്ധപ്പെട്ട് മന്ത്രി കെ.ടി ജലീലിനെ എൻഐഎ ചോദ്യം ചെയ്യുകയാണ്. കൊച്ചിയിലെ എൻഐഎ ഓഫീസിലാണ് മന്ത്രിയെ ചോദ്യം ചെയ്യുന്നത്. പുലർച്ചെ ആറോടെ സ്വകാര്യ കാറിലാണ് ജലീൽ എത്തിയത്. കഴിഞ്ഞ ദിവസം ലഭിച്ച നോട്ടീസിന്റെ അടിസ്ഥാനത്തിലാണ് മന്ത്രി എൻഐഎ ഓഫീസിൽ എത്തിയിരിക്കുന്നത്.
സ്വർണ്ണം അല്ലെങ്കിൽ ഏതെങ്കിലും ഹവാല ഇടപാടുകൾ മതഗ്രന്ഥത്തിൻറ മറവിൽ നടന്നിട്ടുണ്ടോയെന്നതാണ് പരിശോധനാ വിഷയമെന്നാണ് റിപ്പോർട്ട്. ആദ്യം ഇഡി മന്ത്രിയുടെ മൊഴിയെടുത്ത ഘട്ടത്തിലും ഇതുസംബന്ധിച്ച അറിവുണ്ടായിട്ടില്ലെന്ന നിലപാടാണ് അദ്ദേഹം സ്വീകരിച്ചത്.
എൻഐഎ ഓഫീസിന് മുന്നിൽ വൻ പൊലീസ് സംഘത്തെയാണ് വിന്യസിച്ചിരിക്കുന്നത്. ഡിസിപി ജി. പൂങ്കുഴലിയുടെ നേതൃത്വത്തിലാണ് പോലീസ് വിന്യാസം.
