കോട്ടയം: മലയാളത്തിൽ ആദ്യമായി ഒരു സിനിമ തിയറ്ററിൽ റിലീസ് ചെയ്യുന്നതിനു മുൻപ് ഓണ്‍ലൈൻ പ്ലാറ്റ്ഫോമിൽ എത്തുന്നു. കോവിഡ് 19 പ്രതിസന്ധിയെ തുടർന്ന് തിയറ്റുകൾ അടഞ്ഞുകിടക്കുന്ന സാഹചര്യത്തിലാണ് പുതിയ നീക്കം.
ജയസൂര്യ നായകനാകുന്ന ചിത്രം സൂഫിയും സുജാതയും ആമസോണ് പ്രൈമിലൂടെയാണ് റിലീസിനെത്തുക. മലയാളത്തിൽ ആദ്യമായാണ് ഇങ്ങനെയൊരു ഡിജിറ്റൽ റിലീസ് നടക്കാൻ പോകുന്നത്. ആമസോണ് പ്രൈമും ഇക്കാര്യം സ്ഥിരീകരിച്ചു.
നവാഗതനായ നരണിപ്പുഴ ഷാനവാസ് സംവിധാനം ചെയ്ത സിനിമ ഫ്രൈഡേ ഫിലിം ഹൗസിന്‍റെ ബാനറിൽ വിജയ് ബാബുവാണ് നിർമിച്ചിരിക്കുന്നത്. അദിതി റാവു ഹൈദരിയാണ് നായിക. ജയസൂര്യയാണ് ചിത്രം ആമസോണ് പ്രൈമിലൂടെ റിലീസ് ചെയ്യുമെന്ന് പ്രഖ്യാപിച്ചത്. സിനിമ എന്ന് റിലീസ് ചെയ്യുമെന്ന് അറിയിച്ചിട്ടില്ല.
തിയറ്റുകൾ ഇനി എന്ന് തുറക്കുമെന്ന കാര്യത്തിൽ അനിശ്ചിതത്വമുണ്ട്. അതിനാലാണ് ഓണ്‍ലൈൻ പ്ലാറ്റ്ഫോമിലൂടെ സിനിമ റിലീസ് ചെയ്യാൻ തീരുമാനിച്ചതെന്നും നിർമാതാക്കളുടെ സംഘടനയുമായി ഇക്കാര്യം ചർച്ച ചെയ്തിട്ടുണ്ടെന്നും വിജയ് ബാബു പറഞ്ഞു.
അതേസമയം, മലയാളത്തിൽ ആദ്യമായി ഒരു സിനിമ ഓണ്‍ലൈൻ പ്ലാറ്റ്ഫോമിൽ റിലീസ് ചെയ്യുന്പോൾ തിയറ്റർ ഉടമകളുടെ പ്രതികരണം ശ്രദ്ധേയമാകും. ഓണ്‍ലൈൻ റിലീസ് സംവിധാനത്തെ തിയറ്റർ ഉടമകൾ എതിർക്കാൻ സാധ്യതയുണ്ടെന്നാണു സൂചനകൾ.
