മുംബൈ: കൊളംബോ ടെസ്റ്റിൽ കളിയിലെ താരമായതിനു പിന്നാലെ ഐസിസി ഓൾറൗണ്ടർമാരുടെ പട്ടികയിൽ ഇന്ത്യയുടെ രവീന്ദ്ര ജഡേജ ഒന്നാമത്. ബംഗ്ലാദേശിന്‍റെ ഷക്കിബുൾ ഹസനെ മറികടന്നാണ് ജഡേജയുടെ നേട്ടം. 438 പോയിന്റുള്ള ജഡേജയ്ക്ക് ഏഴു പോയിന്റ് പിന്നിലാണ് ഷക്കിബ്.
ടെസ്റ്റ് ബൗളർമാരുടെ പട്ടികയിലും ജഡേജ ഒന്നാം സ്ഥാനം നിലനിർത്തി. 893 പോയിന്റുള്ള ജഡേജയ്ക്കു പിന്നിൽ 860 പോയിന്റുമായി ഇംഗ്ലണ്ടിന്‍റെ ജയിംസ് ആൻഡേഴ്സണാണുള്ളത്. ഓൾറൗണ്ടർമാരുടെയും ബൗളർമാരുടെയും റാങ്കിംഗിൽ ഇന്ത്യൻ താരം ആർ. അശ്വിനാണ് മൂന്നാമത്.
ബാറ്റ്സ്മാൻമാരുടെ റാങ്കിംഗിൽ ചേതേശ്വർ പൂജാര മൂന്നാം സ്ഥാനത്തെത്തി. ശ്രീലങ്കയ്ക്കെതിരായ പരന്പരയിലെ മൂന്ന് ഇന്നിംഗ്സുകളിൽ രണ്ടിലും പരാജയപ്പെട്ട ഇന്ത്യൻ നായകൻ വിരാട് കോഹ്ലി അഞ്ചാം സ്ഥാനത്താണ്.
