തിരുവനന്തപുരം: വാറ്റ് ഉപകരണങ്ങളുടെ ഓണ്‍ലൈൻ വിൽപ്പനയിൽ കർശന നടപടികളുമായി എക്സൈസ് വകുപ്പ്. ഉപകരണങ്ങളുടെ ഉപയോഗ രീതിയും വിലയും കൃത്യമായി വിവരിച്ചാണ് വാറ്റുപകരണങ്ങൾ വിൽക്കുന്നത്. വിൽപ്പന സംബന്ധിച്ച വിവരം എക്സൈസ് കമ്മീഷണർ ഋഷിരാജ് സിംഗ് സ്ഥിരീകരിച്ചു.
മുൻനിര ഓണ്‍ലൈൻ വ്യാപാര വെബ്സൈറ്റുകളാണ് വാറ്റുപകരണങ്ങൾ വിൽക്കുന്നത്. ഇതു സംബന്ധിച്ചു സൂചനകളുടെ അടിസ്ഥാനത്തിൽ ഋഷിരാജ് സിംഗ് വാറ്റുപകരണങ്ങൾ ഓർഡർ ചെയ്തു വരുത്തിച്ചു. ഇത് പരിശോധിച്ചശേഷമാണ് നടപടി ശക്തമാക്കാൻ കമ്മീഷണർ തീരുമാനിച്ചത്. സൈറ്റുകൾ കൃത്യമായി നിരീക്ഷിക്കാൻ നടപടി സ്വീകരിച്ചതായി എക്സൈസ് കമ്മീഷണർ പറഞ്ഞു.
ലഹരിമരുന്നുകളും ഓണ്‍ലൈൻവഴി വിൽക്കുന്നുണ്ടെന്ന് എക്സൈസ് കമ്മീഷണർ അറിയിച്ചു. എന്നാൽ ഈ ലഹരിഗുളികകൾ ലാബിൽ അയച്ച് പരിശോധിച്ചെന്നും ഗുളികകളിൽ ലഹരിയുടെ അംശമില്ലെന്ന് കണ്ടെത്തിയതെന്നും എക്സൈസ് കമ്മീഷണർ വ്യക്തമാക്കി.
