കോട്ടയം: പശുവിനെ വാങ്ങാൻ സബ്സിഡിയോടെ ക്ഷീര കർഷകന് അനുവദിച്ച തുകയിൽനിന്നും പതിനായിരം രൂപ കൈക്കൂലി വാങ്ങുന്നതിനിടെ വിജിലൻസ് അറസ്റ്റുചെയ്ത മൃഗഡോക്ടറെ റിമാൻഡ് ചെയ്തു.
മുളക്കുളം മൃഗാശുപത്രിയിലെ ഡോക്ടർ അജോ ജോസഫിനെയാണ് വിജിലൻസ് എസ്പി വി.ജി. വിനോദ് കുമാറിന്‍റെ നേതൃത്വത്തിലുള്ള സംഘം അറസ്റ്റു ചെയ്തത്.
മുളക്കുളം സ്വദേശിയായ ക്ഷീര കർഷകൻ റീ ബിൽഡ് കേരള വഴി പശുവിനെ വാങ്ങുന്നതിനു 1.20 ലക്ഷം രൂപ വായ്പ ലഭിക്കുന്നതിനുള്ള ഗുണഭോക്തൃ ലിസ്റ്റിൽ ഉൾപ്പെട്ടിരുന്നു.
പശുവിനെ വാങ്ങുന്പോൾ കർഷകർക്ക് 60,000 രൂപ സബ്സിഡി ഇനത്തിൽ ലഭിക്കും.
പശുവിനെ അതത് പ്രദേശത്തെ മൃഗഡോക്ടർ പരിശോധിച്ച് നൽകുന്ന സർട്ടിഫിക്കറ്റിന്‍റെ അടിസ്ഥാനത്തിലാണ് സബ്സിഡി നൽകുന്നത്.
ഇതിനായി കർഷൻ മൃഗഡോക്ടറെ സമീപിച്ചെങ്കിലും സർട്ടിഫിക്കറ്റ് നൽകുന്നതിനു പതിനായിരം രൂപ കൈക്കൂലി ആവശ്യപ്പെടുകയായിരുന്നു.
മക്കളുടെ വിദ്യാഭ്യാസകാര്യം അടക്കം നോക്കണമെന്നും പണമില്ലെന്നും കൈക്കൂലി തുക അയ്യായിരമായി കുറയ്ക്കണമെന്നും കർഷകൻ ആവശ്യപ്പെട്ടു.
പണം നൽകിയില്ലെങ്കിൽ പദ്ധതി മറ്റാർക്കെങ്കിലും മറിച്ച് നൽകുമെന്നായിരുന്നു ഡോക്ടറുടെ നിലപാട്. കർഷകൻ പരാതിയുമായി വിജിലൻസിനെ സമീപിച്ചു.
വിജിലൻസ് നിർദേശം അനുസരിച്ചു ഇന്നലെ ഉച്ചയ്ക്ക് 12നു മൃഗാശുപത്രിയിൽ ക്ഷീര കർഷകന്‍റെ പക്കൽനിന്നും പതിനായിരം രൂപ കൈക്കൂലി വാങ്ങുന്നതിനിടെ ഡോക്ടറെ വിജിലൻസ് സംഘം പിടികൂടുകയായിരുന്നു.
അന്വേഷണസംഘത്തിൽ വിജിലൻസ് തെക്കൻ മേഖല ഡിവൈഎസ്പി എ.കെ. വിശ്വനാഥൻ, ഇൻസ്പെക്ടർമാരായ റിജോ പി. ജോസഫ്, രാജൻ കെ. അരമന, എസ്ഐമാരായ വിൻസന്‍റ് കെ. മാത്യു, സാനി തോമസ്, തുളസീധരക്കുറുപ്പ്, സുരേഷ് കുമാർ, തോമസ്, എഎസ്ഐമാരായ ഡി. വിനു, കെ.ജി. സുരേഷ് കുമാർ, സിവിൽ പോലീസ് ഓഫീസർമാരായ കെ.എ. അനൂപ്, രഞ്ജിത്ത്, സൂരജ്, ശോഭൻ, ബിജു എന്നിവർ ചേർന്നാണു പ്രതിയെ പിടികൂടിയത്. കോടതിയിൽ ഹാജരാക്കിയ ഡോക്്ടറെ റിമാർഡ് ചെയ്തു.
