കോട്ടയം: പി.ജെ.ജോസഫും മോൻസ് ജോസഫും എംഎൽഎ സ്ഥാനം രാജിവച്ചു. കഴിഞ്ഞ നിയമസഭാ തെരഞ്ഞെടുപ്പിൽ രണ്ടി ചിഹ്നത്തിൽ ജയിച്ച ഇരുവരും അയോഗ്യത ഒഴിവാക്കുന്നതിന് വേണ്ടിയാണ് രാജി സമർപ്പിച്ചത്.
രാജിക്കത്ത് നിയമസഭാ സെക്രട്ടറിക്ക് കൈമാറി. അയോഗ്യത ഒഴിവാക്കാൻ രാജിവയ്ക്കണമെന്ന് ഇരുവർക്കും നിയമോപദേശം ലഭിച്ചിരുന്നു.
അതിനിടെ കേരള കോണ്ഗ്രസ്-ജോസഫ് വിഭാഗം സ്ഥാനാർഥികളുടെ ചിഹ്നം സംബന്ധിച്ച അനിശ്ചിതത്വവും തുടരുകയാണ്.
നാമനിർദ്ദേശ പത്രിക സമർപ്പിക്കാൻ ഇന്നും കൂടിയേ സമയമുള്ളൂ. അവസാന മണിക്കൂറിലും ജോസഫ് വിഭാഗം സ്ഥാനാർഥികൾക്ക് ചിഹ്നം അനുവദിച്ച് ലഭിച്ചിട്ടില്ല.
പത്രിക സമർപ്പിക്കുന്നതിന് 10 മണ്ഡലങ്ങളിൽ മത്സരിക്കുന്ന ജോസഫ് വിഭാഗം സ്ഥാനാർഥികളും ചിഹ്നത്തിന്‍റെ കാര്യത്തിൽ അന്തിമ തീരുമാനം അറിയാൻ കാത്തിരിക്കുകയാണ്.
ട്രാക്ടർ, തെങ്ങിൻതോപ്പ് എന്നിവയിൽ ഒന്ന് തെരഞ്ഞെടുപ്പ് ചിഹ്നമായി അനുവദിക്കണമെന്നാണ് ജോസഫ് വിഭാഗം കമ്മീഷനോട് ആവശ്യപ്പെട്ടിരിക്കുന്നത്.
ഇക്കാര്യത്തിൽ ഉടനടി അന്തിമ തീരുമാനമുണ്ടായില്ലെങ്കിൽ ട്രാക്ടർ പ്രഥമ പരിഗണന നൽകി 10 സ്ഥാനാർഥികളും പത്രിക സമർപ്പിക്കാനാണ് നിലവിൽ നീക്കം.
പിന്നീട് കമ്മീഷൻ തീരുമാനം വന്നശേഷം ഭാവിപരിപാടികൾ ആലോചിക്കാനാണ് ജോസഫ് വിഭാഗത്തിന്‍റെ തീരുമാനം.
