ജ്യോതി കിഷന്‍ജി ആംഗേ ചെറിയൊരു ആഘോഷത്തിരക്കിലാണ്. ജ്യോതിയെ അറിയില്ലേ? ലോകത്തിലെ ഏറ്റവും ചെറിയ മനുഷ്യ സ്ത്രീയാണ് ജ്യോതി. 61.95 സെന്‍റിമീറ്റര്‍ മാത്രം നീളമുള്ള ജ്യോതി ലോകത്തില്‍ ജീവിച്ചിരിക്കുന്ന ഏറ്റവും ചെറിയ സ്ത്രീയായി അറിയപ്പെടാന്‍ തുടങ്ങിയത് 2009 മുതലാണ്.
വെറും അഞ്ചര കിലോ ഭാരം മാത്രമാണ് ജ്യോതിക്കുള്ളത്. ജനിച്ചതിന് ശേഷം നാല് കിലോ മാത്രമാണ് ജ്യോതിയുടെ ഭാരം വര്‍ധിച്ചത്.
ഫുജി ടിവിയില്‍ വന്ന ഒരു റിയാലിറ്റി ഷോയിലൂടെയാണ് ജ്യോതി പ്രസിദ്ധയാവുന്നത്.
അക്കന്ഡ്രോപ്ലാസിയ എന്ന അവസ്ഥയാണ് ജ്യോതിയുടേത്. എല്ലുകളെയാണ് ഇത് ബാധിക്കുന്നത്. ഇത്തരം രോഗം ബാധിക്കുന്നവര്‍ വിരൂപരാകുന്ന അവസ്ഥയും ഉണ്ട്.
ജ്യോതിയുടെ അച്ഛനും അമ്മയും സഹോദരിയുമെല്ലാം സാധാരണ ഉയരമുള്ളവരാണ്. അഞ്ച് വയസുവരെ ജ്യോതിയും മറ്റെല്ലാ കുട്ടികളെയും പോലെ വളര്‍ന്നിരുന്നുവെന്ന് അമ്മ രഞ്ചന പറയുന്നു.
ഇനി ആഘോഷക്കഥയിലേക്ക് മടങ്ങിവരാം. ജ്യോതി തന്‍റെ 27-ാം ജന്മദിനത്തിന്‍റെ ആഘോഷത്തിലാണിപ്പോൾ. പിറന്നാൾ കേക്കിനൊപ്പം ഇരിക്കുന്ന ജ്യോതിയുടെ ചിത്രങ്ങൾ സോഷ്യൽ മീഡിയയിൽ വൈറലാണ്.
