തൃശൂർ: ശബരിമലയോട് വനംവകുപ്പിന് ശത്രുതാ മനോഭാവമില്ലെന്ന് വനംവകുപ്പു മന്ത്രി കെ.രാജു. വനംവകുപ്പിന് ശത്രുതാ മനോഭാവമാണുള്ളതെന്നും ദേവസ്വം ബോർഡിന്റെ നിർമാണ പ്രവർത്തനങ്ങളിൽ തടസം നിൽക്കുന്ന നിലപാടാണ് വനംവകുപ്പ് സ്വീകരിക്കുന്നതെന്നും തിരുവിതാംകൂർ ദേവസ്വം ബോർഡ് പ്രസിഡന്‍റ് എം.പത്മകുമാർ പറഞ്ഞതിന് തൃശൂരിൽ മറുപടി നൽകുകയായിരുന്നു മന്ത്രി.
വളരെ സൗഹാർദ്ദപരമായാണ് വനംവകുപ്പും സർക്കാരും ശബരിമലയെ കാണുന്നതെന്നും മന്ത്രി പറഞ്ഞു. അയ്യപ്പന്‍റെ പൂങ്കാവനത്തെ വനത്തിന്‍റെ അവസ്ഥയിൽ തന്നെ നിലനിർത്തുമെന്ന് മന്ത്രി വ്യക്തമാക്കി. മാസ്റ്റർ പ്ലാനിൽ അംഗീകരിച്ച കെട്ടിടങ്ങൾക്ക് മാത്രമേ ശബരിമലയിൽ അനുമതി നൽകുകയുള്ളുവെന്നും മന്ത്രി രാജു പറഞ്ഞു.
