തിരുവനന്തപുരം: മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറി സി.എം. രവീന്ദ്രന്‍റെ ആശുപത്രിവാസത്തെ പിന്തുണച്ച് മന്ത്രി കടകംപള്ളി സുരേന്ദ്രൻ. സുഖമില്ലാത്തതുകൊണ്ട് തന്നെയാണ് രവീന്ദ്രനെ ആശുപത്രിയിൽ പ്രവേശിപ്പിച്ചതെന്നും അദ്ദേഹം സത്യസന്ധനാണെന്നും കടകംപള്ളി സുരേന്ദ്രൻ പറഞ്ഞു.
രവീന്ദ്രനെ ആശുപത്രിയിൽ പ്രവേശിപ്പിച്ചതിനെ തെറ്റായി വ്യാഖ്യാനിക്കേണ്ട കാര്യമില്ല. രവീന്ദ്രൻ വിശ്വസ്തനും സത്യസന്ധനുമായ ഉദ്യോഗസ്ഥനാണ്. മുഖ്യമന്ത്രിയുടെ ഓഫീസിനെ കുടുക്കാനാണ് ശ്രമമെന്ന് എല്ലാവർക്കും മനസിലാകുമെന്നും കടകംപള്ളി പറഞ്ഞു.
സ്വർണക്കടത്തു കേസിലെ പ്രതികളുടെ മൊഴികളുടെ അടിസ്ഥാനത്തിൽ എൻഫോഴ്സ്മെന്റ് ഡയറക്ടറേറ്റ് ചോദ്യംചെയ്യുന്നതിനു തൊട്ടുമുന്പാണ് മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറി സി.എം. രവീന്ദ്രനെ മൂന്നാം തവണയും മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്.
വ്യാഴാഴ്ച ചോദ്യംചെയ്യലിനു ഹാജരാകണമെന്നു നിർദേശിച്ച് ഇഡി നോട്ടീസ് നൽകിയിരുന്നു. ഇതിനു പിന്നാലെയാണ് ചൊവ്വാഴ്ച രവീന്ദ്രനെ മൂന്നാം തവണയും മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്.
കോവിഡനന്തര ആരോഗ്യ പ്രശ്നങ്ങളുമായി ബന്ധപ്പെട്ടു ദേഹാസ്വാസ്ഥ്യവും തലവേദനയും ക്ഷീണവും ചൂണ്ടിക്കാട്ടി ചൊവ്വാഴ്ച ആശുപത്രിയിൽ എത്തിയ അദ്ദേഹത്തിന് കിടത്തിചികിത്സ നിർദേശിച്ചതായി മെഡിക്കൽ കോളജ് അധികൃതർ പറഞ്ഞു.
ലൈഫ് മിഷൻ ഇടപാടുമായി ബന്ധപ്പെട്ട ചോദ്യം ചെയ്യലിനായി വ്യാഴാഴ്ച കൊച്ചി ഓഫീസിൽ ഹാജരാകണമെന്നു കാട്ടിയാണ് ഇഡി നോട്ടീസ് നൽകിയത്. നോട്ടീസ് നൽകിയതിനു പിന്നാലെ നേരത്തേ രണ്ടുതവണ അദ്ദേഹം മെഡിക്കൽ കോളജ് ആശുപത്രിയിൽ ചികിത്സ തേടിയിരുന്നു.
ആദ്യം ചോദ്യംചെയ്യാൻ വിളിച്ചപ്പോൾ കോവിഡ് ബാധിതനായതിനെ തുടർന്നാണു ചികിത്സ തേടിയത്. പിന്നീട് കോവിഡനന്തര ആരോഗ്യപ്രശ്നങ്ങൾ ചൂണ്ടിക്കാട്ടിയാണ് ആശുപത്രിയിൽ പ്രവേശിച്ചത്.
